УИХ-ын Тамгын газар, Азийн сан, Unread Media хамтран зохион байгуулсан “Нээлттэй парламент” хакатоны 24 цагийн хөгжүүлэлтийн тэмцээний хаалтын ажиллагаа өчигдөр болж, шилдгүүдээ тодрууллаа.

Тэмцээний хаалтын ажиллагаанд УИХ-ын дарга С.Бямбацогт оролцов. Тэрбээр баг тус бүр ажил хэрэгч технологийн шийдэл танилцуулж байгаад сэтгэл хангалуун байгаагаа илэрхийлээд парламентын үйл ажиллагааг илүү нээлттэй, мэдээллийг илүү ойлгомжтой, цэгцтэй, үр өгөөжтэй байдлаар олон нийтэд хүргэх технологийн шийдлийг хүлээн авч, цаашид ч нээлттэй хамтран ажиллахаа илэрхийллээ.

Хиймэл оюун, технологийн дэвшлийг ашиглан парламентын үйл ажиллагааг иргэдэд илүү нээлттэй, ойлгомжтой хүртээмжтэй болгох чиглэлээр өөрсдийн шийдлээ танилцуулсан “Нээлттэй парламент” хакатоны 24 цагийн хөгжүүлэлтийн тэмцээнд нийт 32 багаас шалгарсан шилдэг 10 баг оролцож, оюун ухаан, авьяас чадвар, бүтээлч сэтгэлгээгээрээ өрсөлджээ.  Багууд УИХ-ын Тамгын газрын олон нийтэд ил болгосон хуулийн хүрээнд ашиглах боломжтой бүх дата, мэдээллийг технологийн шийдлээр хэрхэн энгийн, ойлгомжтой, хүртээмжтэй, сонирхолтой байдлаар хүргэх вэ гэдгийг гол зарчмаа болгож ажилласан байна.

Шүүгчдийн бүрэлдэхүүнд УИХ-ын Тамгын газрын дэд дарга Ц.Одхүү, Азийн сангийн Засаглалийн хөтөлбөрийн захирал Г.Золжаргал, “Альфа Брэйн” компанийн захирал Т.Билгүүн нар ажиллаж, шилдгүүдийг тодруулсан юм.

I байрт “Хуралдай” баг  “Дагалдах актын хяналтын AI туслах” хөгжүүлэлтээр

II байрт “Сод тод гялалзана” баг “Хөгжлийн бэрхшээл оролцоонд саад болохгүй” хөгжүүлэлтээр

III байрт “Zero one” баг “Нээлттэй парламент-нээлттэй өгөгдөлд суурилсан AI туслах” хөгжүүлэлтээр шалгарч, өргөмжлөл, мөнгөн шагналаар шагнуулсныг УИХ-ын  Нээлттэй парламентын газраас мэдээлэв.