/Reuters/ Өмнөд Солонгосын Ерөнхийлөгч Ли Жэ Мён баасан гаригт буюу өнөөдөр "Улс орноо мөргөлдөөнд татагдан ороход хүргэх цэргийн хүчийг Ойрх Дорнод руу илгээхгүй" гэлээ. Гэсэн хэдий ч тус бүс нутгийн усан замын аюулгүй байдлыг хангахад илүү идэвхтэй үүрэг гүйцэтгэх эсэхээ Сөүл судалж байгаа ажээ.

Өмнөд Солонгос далайн дээрэмтэй тэмцэх ажиллагааны хүрээнд Сомалийн эрэг орчимд тэнгисийн цэргийн хүчээ байрлуулаад байгаа боловч Ирантай үүссэн сөргөлдөөнтэй холбогдуулан Вашингтоныг цэргийн хүчээр дэмжихэд илүү идэвхтэй үүрэг гүйцэтгэхийг АНУ-ын Ерөнхийлөгч Дональд Трампын уриалгыг хүлээн авахаас татгалзсаар байгаа юм.

"Бид дайнтай холбоотой аливаа ажиллагаанд оролцох, дайнд татагдан ороход хүргэх цэрэг байрлуулахгүй. Үүнийг би маш тодорхой хэлж чадна. Энэ зорилгоор бид ямар нэгэн хэлбэрээр цэргийн хүч, хэрэгсэл илгээхгүй" гэж Ли хэвлэлийн хурлын үеэр хэлжээ. 

"Гэсэн хэдий ч Өмнөд Солонгос бусад улс орны адил худалдааны хөлөг онгоц болон газрын тосны тээвэрлэлтийн аюулгүй байдлыг хамгаалах, мөн иргэдийнхээ аюулгүй байдлыг хангахын тулд тодорхой хэмжээний арга хэмжээ авах шаардлагатай гэдэг нь тодорхой" гэж тэрбээр нэмж дурдсан байна.

Өмнөд Солонгосын Засгийн газар Ормузын хоолой руу цэргийн хүч илгээх боломжийг судалж байгаа боловч дотоодод төдийлөн дэмжлэг хүлээхгүй байгаа ажээ.

Ирантай хийж буй дайнд хангалттай дэмжлэг үзүүлэхгүй байна хэмээн Д.Трамп Өмнөд Солонгосыг шүүмжилж, хоёр улсын зэвсэгт хүчний энэ зун хийхээр төлөвлөсөн цэргийн хамтарсан томоохон сургуулилалтуудын цар хүрээг багасгасан нь АНУ-ын холбоотон улс болох Өмнөд Солонгосын эрх баригчдыг түгшээжээ.