Байгаль, түүх, соёлын арвин үнэ цэнтэй Богдхан уулын зэрлэг амьтдын нүүдэл, шилжилт хөдөлгөөнд саад болохгүйн тулд экологийн гарц байгуулахаар боллоо.

Халиун буга, бор гөрөөс, хүдэр, булга, туулай зэрэг олон зүйлийн зэрлэг амьтны амьдрах орчин болсон энэ газар хотжилт, авто болон төмөр зам, хашаа байгууламжийн улмаас амьтдын нүүдэл, шилжих хөдөлгөөний зам хумигдаад байгаа. Ялангуяа халиун буга, бор гөрөөс зэрэг амьтны Туул гол руу орох, гарах хөдөлгөөн хязгаарлагдаж, зам тээврийн осолд өртөх, зэрлэг нохдод хөөгдөх, хашаа байгууламжид хавчигдах тохиолдол гарсаар байгаа.

Иймээс БОУАӨ-ийн сайдын зөвлөлийн гишүүн, Монголын байгаль хамгаалагчдын холбооны гүйцэтгэх захирал, биологич С.Баярхүү, БОУАӨ-ийн сайдын зөвлөх Ё.Онон, холбогдох байгууллага, мэргэжлийн хүмүүсийн төлөөлөл хуралдаж, экологийн гарц байгуулах эхний байршлыг эцэслэн тогтоов. Хувийн хэвшлийн хөрөнгө оруулалтаар барих энэ гарц нь зэрлэг амьтдын нүүдэл, шилжилтийн боломжийг нэмж, амьдрах орчны холбоосыг сэргээх, зам тээврийн осол, бусад эрсдэлийг багасгах ач холбогдолтой юм.

Талуудын байгуулсан хамтын ажиллагааны санамж бичгийг бодит ажил болгох, экологийн гарцыг богино хугацаанд хийхэд хамтран ажиллахаа БОУАӨЯ-ны Төрийн нарийн бичгийн дарга Ш.Батбаяр тухайн байршилд ажиллаж, нөхцөл байдалтай танилцах үеэрээ тодотгожээ.

Богдхан уулыг ЮНЕСКО-гийн Хүн ба шим мандлын хөтөлбөрийн Дэлхийн шим мандлын нөөц газрын сүлжээнд 1996 онд бүртгэсэн бөгөөд дээрх амьтад нь шим мандлын нөөц газрын хамгаалалтад чухал ач холбогдолтой ажээ.