Германы дараагийн ерөнхийлөгч нь эмэгтэй хүн байх ёстой, ХБНГУ байгуулагдсанаас хойших 77 жилийн хугацаанд энэ албан тушаалд эмэгтэй хүн сонгогдоогүй гэж канцлер асан Ангела Меркель мэдэгджээ. Телевизийн MagentaTV сувагт тэрбээр ярилцлага өгөхдөө, төрийн тэргүүний албыг хашиж чадах эмэгтэйчүүд Германд бий гэдгийг дурдсан боловч тодорхой хүмүүсийн нэрийг хэлсэнгүй.
Spiegel сэтгүүлд бичсэнээр, Бавариа мужийн парламентын дарга Ильзе Айгнер, Бундестагийн дарга, Христийн ардчилсан холбооноос нэр дэвших магадлалтай Юлия Клёкнер, Боловсролын сайд Карин Прин, Христийн ардчилсан холбооны дарга асан Аннегрет Крамп-Карренбауэр зэрэг эмэгтэйчүүд ерөнхийлөгчид өрсөлдөх боломжтой ажээ.
Германы ерөнхийлөгчийн сонгууль 2027 оны нэгдүгээр сарын 30-нд болно. Бундестагийн 630 депутатаас бүрдэх Холбооны хурал, мөн Холбооны мужуудын парламентаас сонгогдсон мөн тооны депутат буюу нийт 1260 хүн төрийн тэргүүнийг сонгоно.
Одоогийн ерөнхийлөгч Вальтер Штайнмайерын бүрэн эрхийн хугацаа 2027 оны гуравдугаар сарын 18-нд дуусгавар болох бөгөөд тэрбээр дахин нэр дэвших эрхгүй.
Ташрамд дурдахад, А.Меркель 2005-2021 онд Германы засгийн газрыг тэргүүлсэн бөгөөд Холбооны канцлераар ажилласан анхны эмэгтэй юм. Тэрбээр 2016 онд ерөнхийлөгчид нэр дэвшсэн Франк-Вальтер Штайнмайерыг дэмжиж байжээ. Штайнмайер 2017 оны хоёрдугаар сард төрийн тэргүүнээр сонгогдож, улмаар 2022 онд дахин сонгогдсон юм.
Kazinform
