Олон улсын шатрын холбооноос Узбекистаны Самарканд хотод хөгжлийн бэрхшээлтэй шатарчдын гуравдугаар олимпиадыг зохион байгууллаа.

Өчигдөр болсон сүүлийн өрөгт Монгол Улсын пара шатрын баг Энэтхэгийн багийг 2.5:1.5 оноогоор буулган авснаар дөрөв дэх хожлоо авч тэмцээнийг ялалтаар дуусгав. Ингэснээр манай шатарчид дөрвөн хожил, хоёр тэнцээ, нэг хожигдолтой 41 орноос зургаадугаар байрт шалгарлаа. Тэд эхний хоёр тойрогтоо тэнцэж, дараа нь хожигдсон ч сүүлийн дөрвөн тоглолтдоо дараалан хожиж онцгойрлоо. III олимпиадыг Польшийн шатарчид зургаан хожил, нэг тэнцээ авснаар түрүүлсэн бол Куба, зохион байгуулагч Узбекистаны баг мөнгө, хүрэл медалийг хүртлээ. 

Монгол Улсын пара шатрын баг дэлхийн олимпиадад анх удаа оролцохдоо шатрын эх орон Энэтхэгийг хожиж, чансааны нэгдүгээрт эрэмбэлэгдэж энэ тэмцээнд түрүүлсэн Польшийн багаас тэнцээний оноо авсан цорын ганц баг болсон юм. Мөн манай шатарчид АНУ, ОХУ-ын багуудтай адил 10 оноо авч шилдэг зургаан багийн нэгээр шалгарсан нь онцлох амжилт юм.

Монголын пара шатарчдын багийг их мастер Г.Мөнхгал дасгалжуулж энэхүү тэмцээнд бэлтгэн оролцуулсан юм. Багийн бүрэлдэхүүнд дэд мастер Б.Болд-Эрдэнэ, Ц.Түмэнбаяр, С.Сундуй, М.Хишигбаяр, нөөц тоглогчоор Б.Хашцэцэг нар багтаж, дэлхийн шилдэг багуудтай онцлох тоглолтуудыг хийлээ. Хөгжлийн бэрхшээлтэй шатарчдын гуравдугаар олимпиадын зохион байгуулах бүрэлдэхүүнд Монголын шатрын холбооны шүүгч, төлөөлөл багтан ажилласан байна.