“Говийн бага дархан цаазат газрын экосистемийн онцлог, биологийн олон янз байдал” эрдэм шинжилгээний хурал үргэлжилж байна.

Хурлаар тус газрын экосистемийн онцлог, биологийн олон янз байдлын төлөв байдал, ховор, нэн ховор амьтан, ургамлыг хамгаалал судалгаа, мониторингийн үр дүнг хэлэлцэн, ургамлын бүрдэл, шувуудын зүйлийн олон янз байдал, тархалт, тоо толгой, хамгааллын тухай хөндөж, зарим судалгааг танилцуулав.

БОУАӨ-ийн сайд Ц.Сандаг-Очир хурлыг нээж хэлсэн үгэндээ Монгол Улсын нутаг дэвсгэрийн 20.8 хувь буюу 32.8 сая га талбайг улсын тусгай хамгаалалтад авч, нэгдсэн сүлжээг бүрдүүлээд байгааг онцолсон.

Ц.Сандаг-Очир:

-“Монголын говь нь уур амьсгалын эрс тэс нөхцөлд дасан зохицсон олон зүйл амьтан, ургамлын амьдрах орчин төдийгүй шинжлэх ухааны судалгаа, танин мэдэхүйн асар их ач холбогдолтой өвөрмөц экосистем. Уур амьсгалын өөрчлөлт, цөлжилт, газрын доройтол, усны нөөцийн хомсдол, биологийн олон янз байдлын бууралт зэрэг хүчин зүйл говийн эмзэг экосистемд сөргөөр нөлөөлөх нь ихсэж буй энэ цаг үед байгаль хамгаалах бодлого, шийдвэрийг шинжлэх ухааны судалгаа, бодит мэдээлэл, мониторингийн үр дүнд тулгуурлан гаргах шаардлагатай” гэв.

Говийн бага дархан цаазат газрын хамгаалалтын захиргаа нь байгуулагдсанаас хойш 20 жилд байгалийн унаган төрх, биологийн олон янз байдлыг хамгаалах, судалгаа, мониторинг хийх, хууль тогтоомжийг хэрэгжүүлэх, орон нутгийн иргэдийн оролцоог нэмэх чиглэлээр ажиллаж иржээ. Хуримтлуулсан судалгаа, мэдээлэл, туршлагад тулгуурлан дараагийн 20 жилд байгаль хамгаалах зорилго, бодлого, менежментийн шинэ арга замыг тодорхойлох нь энэ хурлын зорилго ажээ. Төлөвлөгөөнд говийн ландшафт, заган ой, элсэн манхан, хужир марз, тойром, хуурай, халуун уур амьсгал, биологийн олон янз байдал, амьтдын амьдрах орчин, нүүдлийн холбоос, хамгаалалт, мониторингийн сэдвийг тусгажээ.

Говийн бага дархан цаазат газар гэдэг нь Монголын зүүн өмнөд говийн байгалийн унаган төрх, ховор амьтан ургамлыг улсын тусгай хамгаалалтад авсан нутаг юм. Энэ газрыг 1996 онд дархан цаазат газар болгожээ. Үүнд Өмнөговь аймгийн Ханбогд, Баян-Овоо, Номгон, Сэврэй, Баяндалай, Булган, Гурвантэс, Дорноговь аймгийн Хатанбулаг, Баянхонгор аймгийн Баянлиг, Шинэ Жинст, Баянговь сумын нутаг багтдаг. Газар зүйн хувьд Галбын говь, Борзонгийн говийн өргөн уудам нутгийг хамардаг бөгөөд А, Б гэсэн хоёр хэсэгтэй, нийт талбай нь 1.84 сая га орчим гэж дурджээ. Энд хулан, хар сүүлт, аргаль, янгир зэрэг ховор амьтан амьдрах орчин байдаг юм.

Байгаль орчны салбарын эрдэмтэн судлаач, мэргэжлийн байгууллагын төлөөлөл, байгаль хамгаалагчид оролцож буй хурлын үеэр тус салбарт үнэтэй хувь нэмэр оруулсан албан хаагчдад төрийн дээд одон медаль, салбарын хүндтэй шагнал гардууллаа.