УИХ-ын гишүүн, УИХ дахь Монгол-Швейцарын парламентын бүлгийн дарга П.Батчимэг, УИХ-ын гишүүн, тус бүлгийн дэд дарга Дав.Цогтбаатар нар Швейцарын Холбооны Улсын Үндэсний Зөвлөлийн гишүүн, Үндэсний Зөвлөл дэх Швейцар-Монголын парламентын бүлгийн дарга Лорен Верлигийн урилгаар тус улсад энэ сарын 21-25-нд парламентын бүлгийн айлчлал хийв.
Айлчлалын хүрээнд УИХ-ын гишүүд Швейцарын Холбооны Улсын Үндэсний Зөвлөлийн Ерөнхийлөгч Пьер Андре Пэйжид бараалхан мэндчилж, бүлгийн дарга Лорен Верли тэргүүтэй тус бүлгийн гишүүдтэй парламентын бүлэг хоорондын уулзалт хийсэн байна. Түүнчлэн Швейцарын Холбооны Улсын Гадаад харилцааны яамны Төрийн нарийн бичгийн даргын орлогч бөгөөд Ази, Номхон далайн орнуудын газрын захирал Маркус Лейтнер, Швейцарын Холбооны Улсын Уур амьсгалын өөрчлөлтийн асуудлаарх "KliK" сан, Худалдаа, хөрөнгө оруулалтын "Switzerland Global Enterprise" агентлаг, Швейцарын бизнес эрхлэгчдийг нэгтгэсэн "Economiesuisse" холбооны төлөөлөлтэй тус тус уулзаж, хоёр талын хамтын ажиллагааны талаар болон цаашид авч хэрэгжүүлэх арга хэмжээний талаар санал солилцжээ.
Хоёр улсын парламентын бүлэг хоорондын уулзалтаар УИХ-ын гишүүн, УИХ дахь Монгол-Швейцарын парламентын бүлгийн дарга П.Батчимэгийн зүгээс бүлгийн дарга Лорен Верлид хандан Монгол, Швейцар хоёр улсын хооронд дипломат харилцаа тогтоосны 60 жилийн ойн хүрээнд Швейцарын Үндэсний Зөвлөлийн Гадаад харилцааны байнгын хорооны даргын хувиар Монгол Улсад ажлын айлчлал хэрэгжүүлж, улмаар Швейцарын Үндэсний Зөвлөлийн түүхэнд анх удаа Швейцар-Монголын парламентын бүлгийг үүсгэн байгуулсанд гүн талархал илэрхийлж, халуун баяр хүргэж, Монгол Улсын нийгэм, эдийн засгийн хөгжилд Швейцарын Холбооны Улсын төр, засгаас үзүүлж ирсэн дэмжлэг, хувь нэмэрт талархал илэрхийлж, Монгол Улсад ардчилал, эрх зүйт төр, парламентын тогтолцоог бэхжүүлэх чиглэлээр талууд хамтран үр дүнтэй төслүүдийг хэрэгжүүлж ирснийг онцлон тэмдэглэв.
Бүлгийн дарга Лорен Верлигийн зүгээс парламентын ордон, түүний үйл ажиллагаа, бүтэц, бүрэлдэхүүний талаар танилцуулж, 2024 онд Монгол Улсад хэрэгжүүлсэн түүний ажлын айлчлал өндөр сэтгэгдэл үлдээснийг онцлон, нийтлэг үнэт зүйлсэд тулгуурласан бөгөөд газарзүйн болоод соёл уламжлалаар эрс өөр Монгол Улстай парламентын хамтын ажиллагааг өргөжүүлэх хүслээр тус бүлгийг үүсгэн байгуулсныг цохон тэмдэглэжээ. Талууд парламентын найрамдлын бүлэг хоорондын хамтын ажиллагаанаас гадна холбогдох асуудлын хүрээнд Байгын хороод, Тамгын газар хоорондын цаашдын хамтын ажиллагааг өргөжүүлэн хөгжүүлэх боломжийн талаар санал солилцлоо.
Айлчлалын хүрээнд хууль тогтоох байгууллага, засаг захиргааны төв байгууллага болон эдийн засаг, худалдаа, хөрөнгө оруулалт, аж ахуйн нэгж хоорондын хамтын ажиллагааг хөхиүлэн дэмжих чиглэлд холбогдох уулзалтууд хийснээр УИХ-ын гишүүдийн анхны парламентын бүлгийн айлчлал үр дүнтэй болж өндөрлөлөө.
