Биеийн тамир, спортын улсын хороо болон Спортын анагаах ухаан, эрдэм шинжилгээний төв хамтран 2025 оны тавдугаар сарын 12-22-ны өдрүүдэд Увс, Завхан, Архангай аймгуудын өсвөрийн шигшээ багийн тамирчдаас сорил, судалгаа авч, багш, дасгалжуулагч, арга зүйч нарт зориулсан сургалт зохион байгуулж байна. Энэхүү ажлын хүрээнд өсвөр насны хүүхдийн биеийн хөгжлийн онцлог, бэлтгэл сургуулилтын шинжлэх ухааны үндэс, спортын анагаах ухааны мэдлэгийг түгээн дэлгэрүүлэх зорилго тавин ажиллаж байгаа юм.

Энэхүү судалгаа нь Монгол Улсад анх удаа үндэсний хэмжээнд хэрэгжиж буй томоохон суурь судалгаа бөгөөд өсвөр насны тамирчдын биеийн онцлог, бэлтгэлийн үр нөлөө, эрүүл мэндийн үзүүлэлтийг оношлох, зөв чиглэлд хөгжүүлэхэд чухал мэдээлэл өгөх юм. Одоогийн байдлаар нийт 20 аймаг, нийслэлийн 9 дүүргийн 1570 гаруй өсвөрийн тамирчин энэхүү сорилд хамрагдсан бөгөөд зургадугаар сард Хөвсгөл аймагт хийх сорилоор үндэсний хэмжээний энэхүү судалгаа дуусах юм.

Тамирчдын биеийн ерөнхий байдал, өсөлт хөгжил, тэсвэр хатуужил, бэлтгэлийн зохион байгуулалт, эрүүл мэндийн үзүүлэлт зэрэгт дүн шинжилгээ хийснээр спортын анагаах ухаанд суурилсан мэргэжлийн бэлтгэлийг төлөвлөх боломж бүрдэх төдийгүй багш, дасгалжуулагчдад зориулсан сургалт нь онол, практикийн мэдлэгийг хослуулсан үр дүнтэй ажил болж байна.

Эх сурвалж: Биеийн тамир, спортын улсын хороо