Сүүлийн 20 гаруй жилийн хугацаанд Монгол Улс 23 мянган цэргийг Нэгдсэн Үндэстний Байгууллагын энхийг сахиулах ажиллагаанд илгээн үүрэг гүйцэтгүүлээд байна. Энэхүү оролцоо нь манай улсын олон улсын тавцанд хүлээсэн үүрэг, хариуцлагыг биелүүлэх чухал алхам болж ирсэн билээ.

Монгол Улс НҮБ-ын баримталж буй стратегийн шинэ чиг хандлагад нийцүүлэн, энхийг сахиулагчдын чадавх, техник хэрэгслийг нэмэгдүүлэх бодлогыг баримталж байна. Тухайлбал, энэ оны гуравдугаар сард Бүгд Найрамдах Өмнөд Судан Улсад (БНӨСУ) хийсэн ажлын айлчлалын үеэр Батлан хамгаалахын сайд С.Бямбацогт UNMISS ажиллагаанд үүрэг гүйцэтгэж буй монгол цэргүүдийн нөхцөл байдалтай газар дээр нь танилцаж, 24 ширхэг техник шинэчилжээ.

Мөн Монгол Улс энхийг сахиулах ажиллагаанд эмэгтэйчүүдийн оролцоог 15 хувьд хүргэн нэмэгдүүлж, 2023 оны амлалтаа биелүүлснээ НҮБ-ын Ерөнхий нарийн бичгийн дарга Антонио Гуттериштэй уулзах үеэр онцлон дурдсан байна. Энэхүү алхам нь олон улсын энхийг сахиулах үйл хэрэг дэх жендэрийн тэнцвэрийг хангах чиглэлд манай улсын оруулж буй үнэтэй хувь нэмэр юм.

Түүнчлэн дэлхийн геополитикийн нөхцөл байдал адармаатай энэ үед Монгол Улс даян дэлхийн энх тайван, аюулгүй байдлыг хангахад хувь нэмрээ оруулсаар байгаагаа бататгаж, НҮБ-ын өмнө тулгарч буй сорилтуудыг хамтдаа даван туулах итгэл зоригтой байгаагаа илэрхийлжээ.

Монгол Улс НҮБ-ын энхийг дэмжих ажиллагаанд анх 2002 онд оролцож, Бүгд Найрамдах Ардчилсан Конго Улсад хоёр хурандаа, Баруун Сахарт нэг дэслэгч генералыг томилсон түүхтэй. Харин 2003 онд Иракийн эрх чөлөөний төлөөх дайны дараах сэргээн босголт, хүмүүнлэгийн ажиллагаанд цэргийн багийн бие бүрэлдэхүүн оролцож эхэлснээр энхийг сахиулах оролцоо улам өргөжсөн билээ.

Эх сурвалж: Батлан хамгаалах яам, НҮБ