Монгол Улсад гепатит А-ийн эсрэг вакциныг товлолд оруулан нэвтрүүлснээс хойш сүүлийн арван жилийн хугацаанд уг өвчний тохиолдол 25 дахин буурсан байна. Энэ нь вакцины үр дүнтэй байдлыг нотолж буй төдийгүй олон нийтийг хамарсан дархлаажуулалтын чухлыг дахин баталж байна.

Эрүүл мэндийн байгууллагууд нэг настай хоёр сартай болон хоёр настай хүүхдүүдийг гепатит А-ийн эсрэг вакцины хоёр тунгаар бүрэн хамруулахыг уриалж байна. Вакцинд хамрагдсан эсэхийг хүүхдийн дархлаажуулалтын ягаан дэвтэр, emongolia.mn цахим систем, мөн тухайн хүүхдийн харьяа өрхийн эрүүл мэндийн төвөөс лавлах боломжтой.

Хэрвээ товлолын дагуу хамрагдаж чадаагүй бол 3 хүртэлх насны хүүхдүүдийг нөхөн дархлаажуулалтад хамруулах боломжтой бөгөөд энэ үйлчилгээг харьяа сум, өрхийн эрүүл мэндийн төвүүд дээр үнэ төлбөргүй хийж байна.

Гепатит А нь бохир гар, бохирдсон ус, хүнсний бүтээгдэхүүнээр дамжин халдварладаг бөгөөд бага насны хүүхдүүд хамгийн өндөр эрсдэлтэй бүлэгт багтдаг. Иймд вакцинжуулалт бол уг өвчнөөс сэргийлэх хамгийн найдвартай арга юм.

Эх сурвалж: Эрүүл мэндийн яам