Олон улсын музейн өдрийг тохиолдуулан Завхан аймгийн музейгийн хамт олон орон нутгийн иргэд, хүүхэд, залуучуудад түүх, соёлоо танин мэдүүлэх зорилгоор сумдад боловсролын хөтөлбөр хэрэгжүүлжээ.

Эрдэнэхайрхан сумын Соёлын төвийн орон нутаг судлах танхимын дэглэлтийн талаар зөвлөн тусалж, хоёр төрөлт боловсролын хөтөлбөр хэрэгжүүлсэн байна. "Буган чулуун хөшөө" сургалтад 6-9 дүгээр ангийн 68 сурагч хамрагдаж, Монгол орны нутаг дэвсгэр дэх ЮНЕСКО-гийн дэлхийн өвд бүртгэгдсэн буган чулуун хөшөөний гарал үүсэл, ангилал, түүх, түүнийг хэрхэн хамгаалах талаар мэдлэг олж, уран бүтээл урласан нь тэдэнд үндэсний бахархал, түүх соёлын үнэт зүйлийг ойлгуулах чухал алхам болсон юм. Мөн орон нутгийнхаа хөдлөх болон үл хөдлөх соёлын өвийн тухай ойлголтыг гүнзгийрүүлжээ.

Насанд хүрэгчдэд зориулсан “Үйчүүр” хөтөлбөрт 30 гаруй иргэн, албан хаагч хамрагдсан байна. Тус хөтөлбөрөөр дамжуулан уламжлалт монгол наадгайн нэг болох үйчүүр тоглоомын гарал, бүтэц, тоглох арга, соёлын бэлгэдлийг танилцуулж, тоглож үзэх дадлага хийсэн нь ардын уламжлалт соёлыг амьд хэлбэрээр түгээх, өвлүүлэн үлдээхэд чиглэсэн чухал ажил байлаа.

Үйчүүр нь хоорондоо ялгаатай 134 ширхэг амьтны мод, 512 лангийн үнэлгээтэй тоглоом бөгөөд дотоод сэтгэхүй, тооцоолох чадвар, багаар ажиллах ур чадварыг хөгжүүлдэг онцлогтой. Наадамд хожсон хүн хамгийн их лан цуглуулдаг бол арслан авсан мөртлөө хожигдвол “хамуурсан” хэмээн хүндэтгэн хадгалдаг уламжлал бий.

Завхан аймгийн музей эдгээр боловсролын хөтөлбөрөө цаашид бусад сумдад хүргэхээр төлөвлөж байгаагаа мэдэгдсэн бөгөөд энэ нь орон нутгийн өв соёл, үндэсний уламжлалыг таниулан түгээх, үндэсний ухамсар төлөвшүүлэхэд үнэтэй хувь нэмэр оруулна хэмээн үзэж байна.