Монгол Улсын Их Хурлын Ерөнхий нарийн бичгийн дарга Б.Баасандорж, Тамгын газрын дэд дарга Ү.Амарбат нар Орхон аймагт ажиллах үеэрээ тус аймгийн Иргэдийн Төлөөлөгчдийн Хурлын дэргэд Хууль тогтоомж сурталчлах төв нээж, Хамтран ажиллах санамж бичиг байгууллаа.
Тус төвийг нээх нь парламентат ёсыг таниулах, иргэдийн хууль тогтоох үйл хэрэгт оролцох боломжийг нэмэгдүүлэх, УИХ-ын үйл ажиллагааг ил тод, хүртээмжтэй мэдээлэх зорилготой юм. УИХ-ын 2024–2028 оны стратеги төлөвлөгөөнд парламентын үйл ажиллагаа болон хууль тогтоох үйл явцын талаарх иргэдийн мэдлэг боловсролыг нэмэгдүүлэх, иргэд сонгогчид болон УИХ-ын гишүүдийн хоорондын эргэх холбоог сайжруулах зорилтыг тусгасан билээ.
Швейцарын хөгжлийн агентлагийн “Монгол Улсад парламентын ардчиллыг бэхжүүлэх нь” төслийн хүрээнд 2023 оноос эхлэн Өвөрхангай, Баянхонгор, Дархан-Уул, Говьсүмбэр, Увс аймагт тус төвийг байгуулсан бол Орхон аймагт байгуулагдсан төвийг энэ удаа албан ёсоор үйл ажиллагаанд нь оруулсан юм.
Нээлтийн үеэр Б.Баасандорж “Иргэдийн Төлөөлөгчдийн Хурлын дэргэд байгуулж буй энэхүү төв бол Үндсэн хуульд заасан төрийн үйл хэрэгт иргэдийн шууд оролцох эрхийг хэрэгжүүлэх нэг хэлбэр” хэмээн тодотгож, иргэд хуулийн төсөлд санал өгөх, хэлэлцүүлэгт оролцох, хүсэлт өргөдөл гаргах боломжийг бүрдүүлж байгааг онцоллоо.
Түүнчлэн Орхон аймгийн ИТХ-ын дарга Д.Мөнхбат төвийн үйл ажиллагааг бүтээлч, хүртээмжтэй байлгаж, орон нутгийн тогтоол шийдвэрийг иргэдэд сурталчлах, хууль эрх зүйн боловсрол олгох, тэгш оролцоог дэмжихэд анхаарч ажиллахаа илэрхийлжээ.
Ийнхүү парламент болон орон нутгийн хамтын ажиллагааг гүнзгийрүүлсэн энэхүү жишиг төсөл улс орон даяар хэрэгжиж, иргэдийн санал, оролцоонд тулгуурласан хууль тогтоох тогтолцоог хөгжүүлэх чухал алхам болж байна.
Эх сурвалж: Улсын Их Хурлын Хэвлэл мэдээллийн газар
