Сүүлийн жилүүдэд Монгол, Хятадын гадаад худалдааны эргэлт 20 тэрбум ам.долларт хүрч, энэ өсөлтөд нүүрсний экспорт голлох хувь нэмэр оруулсныг Сангийн сайд Б.Жавхлан онцоллоо. Уул уурхайн бүтээгдэхүүний биржийн тухай хуулийн хүрээнд нүүрсийг биржээр арилжаалж эхэлсэн нь төсвийн орлогыг нэмэгдүүлэх, төр, хувийн хэвшлийн хамтын ажиллагааны шинэ хэлбэрийг бүрдүүлж чадсан ч гадаад зах зээлийн таагүй нөхцөлөөс шалтгаалан нүүрсний үнэ унаж, арилжааны идэвх буурч эхэлжээ.

Худалдан авагч талууд нүүрсний зах зээлийн тодорхойгүй байдал, үнийн уналттай холбоотой санаа зовниж байгаагаа илэрхийлж, цаашид арилжааг идэвхжүүлэх боломжийн талаар харилцан санал солилцсон байна.

Сангийн сайд уулзалтын үеэр биржийн хуулийн нэмэлт өөрчлөлтийн талаар танилцуулж, уул уурхайн экспортод тулгуурласан эдийн засгийн өсөлт, баялгийн үр өгөөжийг иргэн бүрт хүргэх бодлого үргэлжилж буйг тэмдэглэв. Тэрээр мөн Гашуунсухайт-Ганцмод чиглэлийн хил дамнасан төмөр замын бүтээн байгуулалт эхэлсэн нь экспортыг дэмжих чухал алхам болсон гэдгийг дурдлаа. Цаашид Шивээхүрэн-Сэхээ, Ханги-Мандал зэрэг боомтуудыг төмөр замаар холбох боломжийг бүрдүүлэхээр ажиллаж байгааг мэдэгдэв.

Эх сурвалж: Сангийн яам