Энэтхэг Улсын Засгийн газрын төлөөлөгчид 2025 оны тавдугаар сарын 12-15-ны өдрүүдэд Монгол Улсад албан ёсны айлчлал хийж, Энэтхэгийн Засгийн газрын санхүүжилтээр хэрэгжиж буй газрын тос боловсруулах үйлдвэрийн төслийн явцтай газар дээр нь танилцлаа.

Айлчлалыг Энэтхэгийн Гадаад хэргийн яамны Тусгай нарийн бичгийн дарга бөгөөд Санхүүгийн зөвлөх Анураг Агарвал ахалсан бөгөөд түүний хамт тус улсын Гадаад хэргийн яам, Сангийн яам, Газрын тос, байгалийн хийн яам, “Инженерс Индиа Лимитед” компанийн удирдлагууд, Экспорт-импортын банкны төлөөлөл багтсан байна.

Төлөөлөгчид тавдугаар сарын 14-ний өдөр "Монгол газрын тос боловсруулах үйлдвэр" ТӨХХК-ийн инженер техникийн баг болон гүйцэтгэгч байгууллагуудын төлөөлөлтэй уулзаж, EPC-I буюу төслийн эхний багц ажлын хэрэгжилт дуусаж, ашиглалтад орсон байдалд сэтгэл хангалуун байгаагаа илэрхийлсэн байна. Мөн Дорноговь аймгийн Засаг дарга О.Батжаргалтай уулзаж, орон нутгийн дэмжлэг, хамтын ажиллагааны талаар санал солилцжээ.

Айлчлалын хүрээнд Энэтхэгийн төлөөлөгчид Сангийн сайд Б.Жавхлан, Аж үйлдвэр, эрдэс баялгийн сайд Ц.Туваан, ҮАБЗ-ийн Нарийн бичгийн дарга А.Бямбажаргал, Ерөнхийлөгчийн гадаад бодлогын зөвлөх Э.Одбаяр, эдийн засгийн бодлогын зөвлөх Б.Даваадалай нартай уулзалт хийж, төслийг амжилттай хэрэгжүүлэх, цаг хугацаанд нь дуусгах, хоёр талын хамтын ажиллагааг гүнзгийрүүлэх талаар хэлэлцсэн байна.

Энэтхэгийн Засгийн газрын санхүүжилтээр баригдаж буй энэхүү үйлдвэрийн бүтээн байгуулалт нь Монгол Улсын эрчим хүчний хараат байдлыг бууруулж, эдийн засгийн чухал дэмжлэг үзүүлэх стратегийн ач холбогдол бүхий төсөл хэмээн үнэлэгдэж байна.

Эх сурвалж: Гадаад харилцааны яам