Чилийн төрийн өмчит “Codelco” компани даваа гарагт Британи-Австралийн “Rio Tinto” компанитай хамтран дэлхийд литийн нөөцөөр хоёрдугаарт ордог Марикунгагийн давсны талбайд олборлолт явуулах шийдвэр гаргаснаа мэдэгдлээ. Энэхүү хамтын ажиллагааны хүрээнд “Rio Tinto” компани “Salar Maricunga SpA” нэртэй хамтарсан үйлдвэрт 900 сая ам.долларын хөрөнгө оруулалт хийж, 49.99 хувийг эзэмших бол, “Codelco” 50.01 хувийн хяналтын багцыг хадгалахаар болжээ.
Уг шийдвэр нь цахилгаан автомашин болон ухаалаг төхөөрөмжийн батерейны гол түүхий эд болох литийн эрэлт дэлхий даяар эрчимтэй нэмэгдэж буйтай холбоотой. АНУ-ын Геологийн албаны мэдээлснээр, Аргентин, Боливи, Чили улсуудын бүрэлдэх “литийн гурвалжин” нь дэлхийн нийт литийн нөөцийн 60 хувийг эзэлдэг ажээ.
Марикунга давсны талбай нь Чилийн хойд нутгийн Атакамагийн дараа литийн агууламж өндөртэй хоёр дахь том талбайд тооцогддог. Чилийн Ерөнхийлөгч Габриэль Борик 2023 оноос хойш төр, хувийн хэвшлийн түншлэлийг өргөжүүлж, литийн олборлолтыг нэмэгдүүлэх бодлого баримталж буй нь энэхүү гэрээг хэрэгжих үндэс болсон байна.
Чили нь Австралийн дараа ордог литийн олборлолтын хоёр дахь том улс бөгөөд одоогоор зөвхөн Атакамагийн талбайгаас литийг олборлож байна. Харин уг шинэ хамтарсан төсөл хэрэгжсэнээр олборлолтын цар хүрээ, боломжийг үлэмж хэмжээгээр нэмэгдүүлэх төлөвтэй байна.
“Rio Tinto” компани нь дэлхийн 35 оронд уул уурхайн үйл ажиллагаа явуулдаг бөгөөд зэс, төмөр, алт зэрэг олон төрлийн ашигт малтмал олборлодог дэлхийн хоёр дахь том уул уурхайн корпораци юм. Тус компани нь мөн Аргентин болон Сербид литийн төслүүдэд оролцож байгаа.
Эх сурвалж: AFP
