Говь-Алтай аймгийн Алтай суманд 100 мянган мод тарих бэлтгэл ажлыг хангаж, байгаль орчны нөхөн сэргээлт, цөлжилтийг бууруулах чиглэлээр өргөн хүрээтэй ажил зохион байгуулж байна. Алтай сумын төв зам дагуу нийт 2034 м.кв талбайд мод тарих хоёр эгнээ шуудууг 62 аж ахуйн нэгж, албан байгууллагын 1260 гаруй албан хаагч хамтран бэлтгэж байгаа нь нутгийн иргэд, байгууллагууд байгаль хамгаалах үйлсэд идэвхтэй оролцож байгааг харуулж байна.

Аймгийн хэмжээнд сүүлийн гурван жилд буюу 2021-2023 онд нийт 260 мянган мод тарьж, эдгээрийн 80 хувь нь ургаж бойжиж байгаа талаар Байгаль орчин, аялал жуулчлалын газраас мэдээллээ. Тарьсан модны дийлэнх нь жимс, жимсгэний мод бөгөөд нийтдээ 70 мянган ширхэг жимсгэний мод, 120 мянган хамгаалалтын ойн зурвас, төв суурин газарт 180 мянган ширхэг мод тарих ажлыг хэрэгжүүлсэн байна.

Говь-Алтай аймгийн нийт газар нутгийн 79.5 хувь нь цөлжилтөд өртөөд байгаа нь тус бүс нутагт байгаль орчны доройтол ноцтой хэмжээнд хүрснийг харуулж байна. Хөхморьт, Баян-Уул, Хариун, Шарга сумын нутаг дэвсгэр цөлжилтөд хамгийн их өртсөн бүс нутагт тооцогдож байна. Энэ нөхцөл байдлыг сааруулах, байгаль экологийн тэнцвэрт байдлыг хадгалахад зориулж Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөний хүрээнд Говь-Алтай аймаг 108 сая мод тарих зорилт дэвшүүлэн ажиллаж байна.

Аймгийн нийт газар нутгийн 10 орчим хувь нь ойтой бөгөөд таван сум шинэсний ойтой, 11 сум заган ойтой хэмээн бүртгэгдсэн байдаг. 2024 онд говийн бүсэд ургадаг шинэс, заган ойг нөхөн сэргээхэд онцгойлон анхаарч, нэмэлт тариалалт хийлгүйгээр 8000 модыг нөхөн тарьж, арчилгааг сайжруулсан байна.

Өнгөрсөн жилийн бүх нийтийн мод тарих өдрийн хүрээнд Есөнбулаг суманд иргэд, аж ахуйн нэгж, албан байгууллагууд хамтран 24 га талбайд улиас, хайлаас зэрэг модны хоёр төрлөөс нийт 7100 ширхэг мод шинээр болон нөхөн тарилт хэлбэрээр суулгажээ.

Мод тарих үндэсний өдрөөр иргэд, аж ахуйн нэгжүүдийг зөвхөн мод тарих бус цаашид мод, бут, сөөгөө арчлан хамгаалахыг уриалж, байгаль орчны төлөөх хариуцлагаа ухамсарлан оролцохыг уриалсан байна.

Эх сурвалж: Говь-Алтай аймгийн Байгаль орчин, аялал жуулчлалын газар