Олон улсын жүдо бөхийн холбооны /IJF/ ээлжит дэлхийн цуврал “Гран слам” ангиллын тэмцээн энэ сарын сүүлчээр Улаанбаатарт зохион байгуулагдахаар болжээ. Уг тэмцээнийг IJF болон Монголын жүдо бөхийн холбоо, Монгол Улсын Ерөнхийлөгчийн тамгын газар, Засгийн газар, Нийслэлийн Засаг даргын Тамгын газар, Улаанбаатар хөгжлийн корпораци, Соёл, спорт, аялал жуулчлал, залуучуудын яам, Биеийн тамир спортын улсын хороо хамтран хариуцан зохион байгуулна.
“Лос Анжелес 2028” зуны олимпын эрхийн оноо, мөн дэлхийн чансааны оноо олгох өндөр зэрэглэлийн энэхүү “Улаанбаатар их дуулга” тэмцээн долдугаар сарын хорин тавнаас хорин долооны өдрүүдэд “AIC Steppe Arena”-д болох юм. Ийнхүү дэлхийн шилдэг жүдо бөхчүүд манай улсад ирж өрсөлдөх нь Монголын спортын нэр хүндийг олон улсад бататгахын зэрэгцээ ирээдүйн олимпын замналыг тодорхойлоход чухал ач холбогдолтой гэж үзэж байна.
