Монгол Улсын хэмжээнд ДОХ болон гепатитийн вирусын илрүүлэг, оношлогоо, баталгаажуулах шинжилгээг төвлөрүүлэн гүйцэтгэдэг Халдварт Өвчин Судлалын Үндэсний Төв (ХӨСҮТ) нь сүүлийн үеийн дэвшилтэт технологийг шинжилгээний практикт нэвтрүүлж байна. Тус төвийн Нэгдсэн лабораторийн албаны хамт олон Анагаахын шинжлэх ухааны үндэсний их сургуулийн мэргэжилтнүүдтэй хамтран ДОХ болон гепатитийн В вирусын бүрэн геномын дарааллыг шинэ үеийн секвенатор (NGS) аргаар тогтоож, үүний үндсэн дээр вирусын генотип хувилбар, мутаци өөрчлөлт, эмийн тэсвэржилтийг илрүүлэх, эмчилгээний хяналт хийх боломжийг бүрдүүлсэн байна.

Өмнө нь мөн ковидын вирусын геномын дарааллыг тодорхойлох NGS технологийг нутагшуулан ашиглаж байсан туршлагадаа тулгуурлан энэхүү шинэ системийг амжилттай туршиж, үйл ажиллагаандаа бүрэн нэвтрүүлснээр оношилгооны чанар, нарийвчлал, үр өгөөжийг сайжруулахад чухал алхам болж байна. Энэ нь цаашид вирусын гаралтай халдварт өвчний хяналт, тархалтын судалгааг илүү үр дүнтэй болгоход хувь нэмэр оруулна гэж мэргэжилтнүүд үзэж байна.

Эх сурвалж: ХӨСҮТ.