Монголын Хуульчдын холбооны зөвлөлөөс хуульчийн мэргэжлийн шалгалтыг энэ жил 10 дахь удаагаа аравдугаар сарын хорин хоёрноос хорин дөрөвний өдрүүдэд зохион байгуулахаар товложээ. Хуульд заасны дагуу шалгалтын товыг наад зах нь далан тав хоногийн өмнө олон нийтэд мэдээлэх үүрэгтэй тул өнөөдөр хэвлэлийн бага хурал хийж, албан ёсоор зарласан байна.

Монголын Хуульчдын холбооны тамгын газрын дарга Ш.Жолбарсын мэдээлснээр энэхүү шалгалт нь хуульчийн мэргэжлийн үйл ажиллагаа эрхлэх зөвшөөрөл хүссэн хүний эрх зүйн мэдлэг, чадвар, шүүн таслах ажиллагаанд оролцох, хууль зүйн туслалцаа үзүүлэх чадамжийг үнэлэх зорилготой. Бакалаврын зэрэгтэй, хоёр жил мэргэжлийн дадлага хийсэн хүмүүс шалгалтад оролцох эрхтэй бөгөөд эрх зүйн ерөнхий мэдлэг болон тодорхой тохиолдолд хууль хэрэглэж шийдвэр гаргах чадварыг хосолсон сорил, бодлогын хэлбэрээр зохион байгуулдаг юм байна.

Хуульчийн мэргэжлийн шалгалтын асуудал эрхэлсэн хорооны гишүүн Т.Мөнх-Эрдэнэ тайлбарлахдаа, шалгалт нь хуульчийн ёс зүй, логик сэтгэлгээ, оновчтой шийдвэр гаргах ур чадвар зэрэг олон талт үнэлгээг багтаадаг иж бүрэн шалгалт гэдгийг онцолж, энэ жилийн гарын авлагын агуулгыг шинэчилсэн болохыг дурдав.

Шалгалтын бүртгэл наймдугаар сарын наймаас есдүгээр сарын хорин нэгний 24:00 цаг хүртэл https://burtgel.mglbar.mn/ цахим хаягаар явагдах бөгөөд шалгалтад оролцогчдод зориулсан бодлого бодох арга зүйн сургалтыг есдүгээр сарын нэгнээс аравдугаар сарын дөрөв хүртэл таван долоо хоногийн хугацаанд зохион байгуулахаар болжээ.

Өмнөх жилүүдийн үр дүнг дурдвал, 2022 онд 1228 иргэн шалгалтад оролцож 371 нь, 2023 онд 1200 шалгуулагчаас 203 нь, 2024 онд 1146 хүнээс 205 нь тэнцэж, хуульчийн мэргэжлийн үйл ажиллагаа эрхлэх эрхээ авсан байна.

Эх сурвалж: Монголын Хуульчдын холбоо.