Монголын сагсан бөмбөгийн дээд лигийн 10 удаагийн аварга “Хасын Хүлэгүүд” баг Азийн аваргуудын лигээс хүрэл медаль хүртлээ.
Тэд финалын шатнаас нэг хожил, нэг хожигдолтой хагас шигшээд шалгарсан. Улмаар Хонконгийн “Сөүт атлетик Чайна”-д 75:90-өөр хожигдсоноор хүрэл медалийн төлөө тоглохоор болсон юм. Хүрлийн төлөөх тоглолтод өчигдөр Индонезийн лигийн аварга “Дэва Юнайтед”-ыг 84:66-гаар буулган авснаар хүрэл медалийг хүзүүндээ зүүх эрхтэй болсон юм. Ингэснээр энэхүү нэр хүндтэй тэмцээнээс жил дараалан медаль авч байна. Тэд өнгөрсөн жил уг тэмцээний аваргаар тодорч байлаа. Хүрэл медалийн төлөөх тоглолтод гавьяат тамирчин Б.Билгүүн долоон оноо, долоон самбар, найман оновчтой дамжуулалт, нэг хаалт гүйцэтгэж, тэгш тоглолт үзүүлжээ. Харин А.Азбаяр 15 оноо, найман самбар, гурван хаалт, Ч.Ихбаяр 14 оноо, дөрвөн самбар гэсэн статистик үзүүлснээр багийнхнаа манлайлсан байна.
Гавьяат тамирчин Б.Билгүүн тоглолтын дараах хэвлэлийн хурлын үеэр, “Индонезийн баг маш хүчтэй байсан. Бид эхний тоглолтод хүлээлтээс доогуур тоглосон. Харин хүрлийн төлөөх тоглолтод алдаагаа давтахгүйг хичээлээ. Бид аваргаа хамгаалах зорилготой байсан ч чадаагүй. Гэхдээ хүрэл медаль бол хожиж авдаг учраас сайхан байна. Ирэх жил бид дүрмийн өөрчлөлтөд дасан зохицох болно” хэмээн ярьжээ.
Азийн аваргуудын лигийн 2026 оны аварга багаар Хонконгийн “Сөүт Атлетик Чайна” баг тодорчээ.
