Боловсролын сайд Л.Энх-Амгалан БНСУ-аас Монгол Улсад суугаа Элчин сайд Чой Жин Вонтой уулзаж, боловсрол, эрүүл мэндийн салбарын хамтын ажиллагааг өргөжүүлэх асуудлаар санал солилцлоо.

Монгол Улс, БНСУ-ын хамтын ажиллагааны хүрээнд сургуулийн хоол үйлдвэрлэл, үйлчилгээний орчныг сайжруулах, мэдээллийн технологийн ухаалаг танхим байгуулах, багш нарыг чадавхжуулах төсөл, багш солилцооны хөтөлбөр, дээд боловсролын салбарт ШУТИС, ХААИС-ийн хүний нөөцийг чадавхжуулах, бэхжүүлэх төслүүдийг амжилттай хэрэгжүүлж байна.

Уулзалтын үеэр хоёр тал цаашид хамтран хэрэгжүүлэх хэд хэдэн томоохон ажлын талаар санал солилцов. Тухайлбал, эрүүл мэндийн салбарт 1000 эмч, сувилагч, судлаач бэлтгэх асуудлыг хэлэлцлээ. Энэхүү санаачилга нь Монгол Улсад бэлтгэгддэггүй болон нэн шаардлагатай эмч, сувилагч, эмнэлгийн мэргэжилтнүүдийг бэлтгэх, анагаахын шинжлэх ухаанд шинэ мэдлэг, технологи, инновацыг нутагшуулах, эрүүл мэндийн салбарын хүний нөөцийн чадавхыг бэхжүүлэхэд чухал ач холбогдолтой юм.

Мөн “Нэг сурагч-Нэг компьютер, Нэг анги-Нэг ухаалаг самбар” үйл ажиллагааг хамтран хэрэгжүүлэх боломжийн талаар санал солилцлоо. Дэжон хотын Боловсролын газартай хамтран хэрэгжүүлж буй “Дэвшилтэт мэдээлэл, харилцаа холбооны технологи ашиглан туршилтын анги байгуулах” төслийн хүрээнд мэдээллийн технологийн орчин, сургалтын чанарыг сайжруулах, багш нарыг мэргэшүүлэх ажлууд үр дүнтэй хэрэгжүүлж байгаа ба энэхүү туршлагад тулгуурлан хамтын ажиллагааг өргөжүүлэх боломжтойг талууд онцлов.

Түүнчлэн КОЙКА-гийн 8 сая ам.долларын буцалтгүй тусламжаар 2022 оноос хэрэгжүүлж буй “Монгол Улсын ерөнхий боловсролын сургуулийн хоол үйлдвэрлэл, үйлчилгээний орчныг сайжруулах, чадавхыг бэхжүүлэх” төслийн 2 дугаар үе шатыг хэрэгжүүлэх талаар санал солилцсон байна.

Уг төслийн хүрээнд ШУТИС-ийн Хүүхдийн хоол шим тэжээл, сургалт арга зүйн үндэсний төв болон ерөнхий боловсролын 10 сургуулийн хоол үйлдвэрлэл, үйлчилгээний орчныг шинэчлэн сайжруулж, шаардлагатай тоног төхөөрөмжөөр ханган жишиг түвшинд хүргэж байгаа юм. Цаашид сургуулийн хоол үйлдвэрлэл, үйлчилгээний тогтолцоо, стандартыг боловсронгуй болгох, бодит загвар бий болгоход чиглэсэн энэхүү үр дүнтэй төслийг үргэлжлүүлэхэд хамтран ажиллахаар талууд санал нэгдсэн талаар Боловсролын яамнаас мэдээлэв.