Манай ард нийт хэзээнээс шооч ёгточ улс. Хагас сайнд болсон Нийслэлийн МАН-ын даргын сонгуулийн дүнг сонсоод: МАН-аас салгаж маньдаа буян болгохоор Б.Пүрэвдагва яллаа гэж.

Яллаа ч гэж дээ, Нийслэлийн Засаг ноён Б.Пүрэвдагва Нийслэлийн МАН-ын даргын сонгуульд ганцаараа өрсөлдөж. 98 шахуу хувийн санал авч. Б.Пүрэвдагва ялахынхаа өмнө бодлогынхоо танилцуулгад: Намын анхан шатны байгууллагын үйл ажиллагааг шинэ шатанд гаргах, бүтэц, зохион байгуулалтыг сайжруулах, гишүүдийн оролцоо, хариуцлагыг нэмэгдүүлнэ.

Нийслэлийн 204 хороонд нэгдсэн стандарт, зохион байгуулалт бүхий франчайз тогтолцоог нэвтрүүлж, хороо бүрийн онцлог, иргэдийн хэрэгцээ, тулгамдсан асуудалд тулгуурлан хөгжүүлнэ. Түүнчлэн намын гишүүнчлэлийн бүртгэл, мэдээллийн нэгдсэн системийг сайжруулах, сургалт, мэдээлэл, үнэлгээ, хариуцлагын стандартыг нэвтрүүлэх, цахим хороог хөгжүүлэхээр төлөвлөжээ. Ингэснээр гишүүд хаанаас ч намын үйл ажиллагаанд оролцох, санал хүсэлтээ хүргүүлэх боломж бүрдэнэ гэж. Яахав, байдаг л бодлого.

Гол юм нь Нийслэлийн Засаг ноён Б.Пүрэвдагва Нийслэлийн МАН-ын дарга боллоо гээд нийслэлчүүд, ядахнаа МАН-ын жирийн гишүүд дэмжигчид нь юу хожих вэ. Хариу нь: Хэн хэн нь айхтар том хожно. Яаж? Хариу нь: Энэ Б.Пүрэвдагва хүү Нийслэлийн МАН-ын даргын сонгуульд ялсан нь маниусыг МАН-аас салгаж буян болох эхлэл. Энэ ч бараг үнэн.

Эдүгээ: Монголоо, нийслэлээ, өөрсдийнхөө ахуй амьдралыг харвал уйлах багадам. Үг хэлэх эрхгүй, өмсөх идэх ч боломжгүй, цаашаагаа хүний эрхийн талаар ярих ямар ч боломжгүй. Монгол Улс дарангуйллын орон болж.

Монголын ард нийт Манжийн 200 жилийн дарлалын үед есөн эрүү давж шийтгүүлдэг байж. Эдүгээ МАН-ын 10 жилийн дарангуйллын хугацаанд хэчнээн ч эрүүг давж шийтгүүлдэг болов, бүү мэд. Заримынх нь тооцоогоор: МАН-д дахиад 19 сар эрүүдүүлж тэсвэл 28 онд эрхбиш дарангуйллаас ангижрах байлгүй гэх. Чухамхүү: Б.Пүрэвдагва хүүгийн Нийслэлийн МАН-ын даргад ганцаараа өрсөлдөөд бараг 100 хувиар ялсан нь энэнд л хэрэгтэй. Үнэн дээ, Манай ард нийт хэзээнээс ёгточ улс…

Ө.Батбилэг /Өдрийн сонин/