Хятадын цэргийн үйл ажиллагаатай холбоотой болгоомжлол үүсээд буй энэ үед аюулгүй байдлын салбар дахь хамтын ажиллагаагаа өргөжүүлэх зорилгоор Япон, Филиппиний удирдагчид тагнуулын мэдээлэл солилцох тухай гэрээ байгуулах асуудлаар албан ёсны хэлэлцээг эхлүүлэхээр шийдвэрлэснээ пүрэв гарагт мэдэгдлээ.

Японы Ерөнхий сайд Санаэ Такаичи, Филиппиний Ерөнхийлөгч Фердинанд Маркос Жуниор нар Токио хотноо хийсэн уулзалтынхаа дараа хамтарсан хэвлэлийн бага хурал хийж, хоёр улсын харилцааг “Иж бүрэн стратегийн түншлэл”-ийн түвшинд хүргэхээр тохиролцсоноо мөн мэдэгдсэн байна.

Талууд өнгөрсөн дөрөвдүгээр сард Япон улс үхлийн аюултай зэвсгийг гадаад улсад шилжүүлэхтэй холбоотой журмаа зөөлрүүлсний дараа Японд үйлдвэрлэсэн байлдааны хөлөг онгоц болон батлан хамгаалахын бусад тоног төхөөрөмжийг Филиппинд нийлүүлэх асуудлыг урагшлуулах чиглэлд нягт хамтран ажиллахаа нотолжээ.

С.Такаичи, Ф.Маркос нарын гаргасан хамтарсан мэдэгдэлд, Япон, Филиппиний харилцаа “урьд өмнө байгаагүй түвшний итгэлцэл, хамтын ажиллагаа, стратегийн хэлхээ холбоо”-оор тодорхойлогдох “алтан эрин үе”-д шилжсэнийг онцолсон байна.

Мэдэгдэлд мөн Дорнод Хятадын тэнгис болон Өмнөд Хятадын тэнгист үүссэн нөхцөл байдалд түгшиж буйгаа илэрхийлээд, энхийн замаар тогтсон өнөөгийн статусыг хүч хэрэглэх, албадлагын аргаар өрөөсгөл байдлаар өөрчлөх аливаа оролдлогыг эрс эсэргүүцэж буйгаа дахин онцолжээ.

Эдийн засгийн хамтын ажиллагааны хүрээнд давхар татвар ногдуулахаас зайлсхийх шинэ хэлэлцээрт хоёр улсын Засгийн газрын төлөөлөгчид гарын үсэг зурсан байна. Ф.Маркосын хэлснээр, уг хэлэлцээр нь “бизнесийн орчныг сайжруулж, хил дамнасан хөрөнгө оруулалтыг нэмэгдүүлэхэд” тус дөхөм үзүүлнэ.

Ф.Маркосын Японд хийж буй дөрвөн өдрийн төрийн айлчлал өнөөдөр өндөрлөнө. Япон, Филиппин улсын хооронд дипломат харилцаа тогтоосны 70 жилийн ой энэ онд тохиож байгаа юм.

Эх сурвалж: Kyodo