Үндсэн Хуулийн Цэцийн дээд суудлын хуралдаан болж УДШ-ийн Ерөнхий шүүгч нэг удаа зургаан жилээр сонгогдож болно гэсэн утгатай шийдвэр гаргав. Энэ нь улстөрчид, төрийн албан хаагчид болон иргэдийн дунд хардлага, айдас дагуулж байна. Энэ талаар Ерөнхий сайд асан УИХ-ын гишүүн Н.Алтанхуяг хэлэхдээ “МАН олон жил хүн биш, хууль засаглана гэдэг байлаа. Одоо тэгвэл хүн засагладаг болжээ. МАН-ын та нар муу байна. МАН ч гэж дээ, танай хэдэн хүн л байгаа шүү. Тэд л мэддэг болж” гэж мэдэгдлээ.

Тэгвэл УИХ-ын гишүүн АН ын дэд дарга Ч.Өнөрбаяр Цэцийн зарим гишүүн ажлаасаа гарсан, даргынх нь хугацаа дуусан байхад ийм шийдвэр гаргадаг нь улс төрийн ашиг хонжоо гэж харж байна. Улсын дээд шүүх гэдэг Монголд шударга ёс тогтоох дээд байгууллага байх учиртай. Гэтэл өнөөдөр Монгол Улс авлигын индексээр 124 дүгээр байр руу ухарлаа. Үүний хариуцлагыг зөвхөн Авлигатай тэмцэх газар биш, шүүх засаглал хамт үүрэх ёстой. Сөрөг хүчний улстөрчдийг улс төрийн зорилгоор Эрүүгийн хэрэгт холбогдуулан намнадаг, шоронгоор айлгадаг байдлаа өөрчлөх хэрэгтэй. Монголд Эрүүгийн бодлого гэдэг зүйл хоёрхон чиглэл рүү ханддаг болжээ. Нэгдүгээрт, бизнес эрхэлж байгаа иргэд рүү чиглэдэг болсон. Хүн бизнес хийснийхээ төлөө шоронд ордог байж болохгүй.

Улс төрийн бодлого хэрэгжүүлснийхээ төлөө, эсвэл эрх баригчдыг шүүмжилснийхээ төлөө хоригддог байж таарахгүй. Эрх баригчид ийм харалган бодлогоо зогсоох ёстой гэв. Мөн УИХ-ын гишүүн АН-ын дэд дарга Л.Мөнхбаясгалан мэдэгдэхдээ “Өчигдөр /2025.05.27/ Монгол Улсын Үндсэн хуулийн Цэцээс "Монгол Улсын дээд шүүхийн Ерөнхий шүүгчийг улируулан томилж болно. Гэхдээ зөвхөн нэг удаа, зургаан жилээр" гэсэн шийдвэр гаргасан нь Үндсэн хууль зөрчсөн үйлдэл боллоо. Үндсэн хуулийн Цэцийн хоёр гишүүн үүнд тусгай санал гаргасан. Ардчилсан намын зүгээс энэ асуудлыг хэрхэвч хүлээн зөвшөөрөхгүй. Учир нь Үндсэн хуулийн Цэцийн хоёр гишүүний бүрэн эрхийн хугацаа дууссан байгаа.

Үүнээс харахад Цэц өөрөө шийдвэр гаргах чадамжтай эсэх асуудал яригдана. Мөн төрийн өндөр албан тушаалтан зургаан жилээс дээш хугацаагаар алба хашиж болохгүй гэсэн заалттай. Жишээ нь, Монгол Улсын Ерөнхийлөгчийг нэг удаа зургаан жилээр сонгодог. Үүнтэй адил Монгол Улсын Ерөнхий шүүгч, дээд шүүхийн шүүгч нар бол төрийн өндөр албан тушаалтан. Хэрэв энэ хүмүүс зургаан жилээсээ улиран томилогдож, 12 жил ажиллах юм бол ашиг сонирхлын зөрчил үүснэ. Ардчилсан намын зүгээс үүнийг хүчтэй эсэргүүцэх бөгөөд Эсэргүүцлийн хороо байгуулж байна. Шаардлагатай бол Улс төрийн зөвлөлийн хурал зарлана. Цаашлаад Үндэсний бодлогын хороог ч хуралдуулна” гэв. УИХ-ын гишүүн Л.Мөнхбаясгалан цааш нь хэлэхдээ БХЯ-ны сайд Л.Батлутыг огцруулахгүй юм бол Ерөнхий сайдыг огцруулна гэж мэдэгдсэн юм. Цэцийн шийдвэр ийнхүү дуулиан шуугиан хар сэр дагуулж байна.

Яагаад гэвэл энэ сунасан томилгоонууд Монгол Улсад дарангуйлал бий болгочих вий гэсэн болгоомжлол төрүүлж байгаа бололтой. Өрсөлдөх эрхтэй л гэж байгаа. Түүнээс сунгаад тавьчихсан юм биш. Өрсөлдөөд л нэг нь гарна гэж маргах хүмүүс байна. Гэвч одоо Ерөнхий шүүгч хийж байгаа хүнтэй өрсөлдөх нь бараг ялах боломжгүй гэцгээх аж. Ийнхүү Цэцээр юуны ч хамаагүй шийдвэр гаргуулаад байгаагаас улстөрчид их сэжиглэж цэрвэж байгаа. Нэг мэдсэн чинь Монгол Улсын Ерөнхийлөгч хүсвэл хэдэн удаа ч сонгогддог болчихсон байх вий гэдгээс улс даяараа айж болгоомжилж байна. Яагаад гэвэл ийм үйлдэл хуулийн дагуу л бий болчихдог туршлага дэлхийгээр нэг бий. Гитлер, Сталин, Путин, Уга Чевас бүгд л хууль номын дагуу сунан сонгогдсоор дийлдэхгүй дарангуйлагч болдог түүхтэй аж.