АНУ-ын Флорида муж дахь пуужин хөөргөх талбайд “Blue Origin” компанид үйлдвэрлэлсэн “New Glenn” пуужин туршилтын явцад дэлбэрчээ. Энэ нь IPO гаргахаар зэхэж буй Илон Маскийн “SpaceX” компанитай өрсөлдөх Жэфф Безосын сансрын салбар дахь хэтийн зорилтод хүнд цохилт боллоо.

“Blue Origin” компани “New Glenn” пуужинг дөрөв дэх удаагаа хөөргөхөөр зэхэж байсан бөгөөд И.Маскийн “Starlink” сүлжээтэй өрсөлдөхүйц өргөн зурвасын хиймэл дагуулын систем байгуулах төлөвлөгөөний хүрээнд “Amazon” компанийн 48 ширхэг “Leo” хиймэл дагуулыг дэлхийн нам тойрог замд оруулах хуваарьтай байжээ.

Удаан хугацаанд хойшлогдсон “New Glenn” төслийн хувьд энэхүү осол нь ээлжит сорилт болж байна. Уг пуужин "NASA"-гийн “Artemis” сар судлалын хөтөлбөрийн хүрээнд Саран дээр газардагч төхөөрөмж болон ачаа тээвэрлэхэд гол үүрэг гүйцэтгэх ёстой юм.

Энэ осол “NASA” агентлаг “Blue Origin” компанитай Саран дээр судалгааны төхөөрөмж буулгах 188 сая ам.долларын өртөгтэй гэрээ байгуулснаас хойш ердөө хоёр хоногийн дараа боллоо. Мөн “SpaceX” компани хөгжүүлэлтээрээ хэдэн жилээр түрүүлж явж буй дараагийн үеийн “Starship” пуужингийн туршилтыг өнгөрсөн долоо хоногт амжилттай явуулсны дараахан гарав.

Пуужинг газарт бэхэлсэн үед хөдөлгүүрийг нь асааж шалгадаг туршилтын үеэр “доголдол” гарсныг “Blue Origin” компани баталсан байна.

Ж.Безос Х хуудсандаа “Өнөөдөр маш хүнд өдөр байлаа. Гэхдээ бид шаардлагатай бүхнийг сэргээн босгож, дахин пуужингаа хөөргөнө. Үүний үр шим заавал ирнэ” хэмээн бичээд, дэлбэрэлтийн шалтгааныг тогтооход эрт байгааг дурджээ.

Харин И.Маск дэлбэрэлтийн дүрс бичлэгт хариу өгөхдөө “Маш харамсалтай хэрэг боллоо. Пуужин бүтээнэ гэдэг амаргүй” гэлээ.