Нийслэлийн Засаг даргын орлогч асан Т.Даваадалайг АТГ-аас яллагдагчаар татан мөрдөн шалгаж байгаа бөгөөд өнгөрөгч баасан гаригт /2026.05.22/ түүнд цагдан хорих таслан сэргийлэх арсан билээ.

Т.Даваадалай нь “Туулын хурдны зам”-ын төслүүдийн сонгон шалгаруулалтын явцад эхнэр Б.Анхтуяа болон түүний үеэл дүүгийн үүсгэн байгуулсан компанийн дансаар 5.6 тэрбум төгрөг, мөн Б.Анхтуяагийн найзынх нь үүсгэн байгуулсан хоёр компанийн дансаар 709 сая төгрөг, Б.Анхтуяагийн 50 хувийг эзэмшдэг компанийн дансаар 47.9 сая төгрөг гээд нийтдээ 6.6 тэрбум төгрөгийг авсан болох нь мөрдөн шалгах ажиллагааны явцад ил болсон байна.

Т.Даваадалайг Эрүүгийн хуулийн  22.1 дүгээр зүйл буюу эрх мэдэл, албан тушаалын байдлаа урвуулан ашиглах, 22.4 дүгээр зүйл буюу нийтийн албан тушаалтан хахууль авах, 18.6 дугаар зүйл буюу мөнгө угаах, 17.4 дүгээр зүйл буюу хөрөнгө завших гэсэн зүйл ангиудаар яллагдагчаар татсан бөгөөд мөрдөн шалгах ажиллагааг үргэлжилж байна. Түүнийг Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1 дэх хэсгийн 1.3-т заасан “...хэргийн ул мөр, эд мөрийн баримт, нотлох баримтыг устгах, өөрчлөх, нуун далдлах, хуурамчаар үйлдэх, гэмт хэрэг үйлдэх болзошгүй...” гэх үндэслэлээр цагдан хорих таслан сэргийлэх арга хэмжээ аваад байгаа. 

Тэгвэл Т.Даваадалайгийн өмгөөлөгч түүний цагдан хорих таслан сэргийлэх арга хэмжээг өөрчлүүлэхээр Дүүргийн Эрүү, Иргэний хэргийн хялбар ажиллагааны анхан шатны шүүхийн Ерөнхий шүүгчид гомдол гаргажээ. Түүний гомдлыг шүүх хэлэлцэх хурал хараахан товлогдоогүй байгаа аж.