Монгол Улсын Их Хурлын дарга Д.Амарбаясгаланд өчигдөр УИХ-ын гишүүн Д.Рэгдэл, Б.Уянга, Г.Хосбаяр нар Шинжлэх ухаан, технологийн тухай хуульд нэмэлт, өөрчлөлт оруулах тухай хуулийн төслийг өргөн барилаа. Тус хуулийн төслөөр хэд хэдэн чухал зохицуулалтыг тусгасан байна.

• Төрийн өмчит эрдэм шинжилгээний байгууллага судалгааны үндсэн чиглэлээрээ Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн дагуу зарлагдсан тендерт оролцох үед тендерийн болон гүйцэтгэлийн баталгаанаас чөлөөлөх зохицуулалтыг тусгасан.

• Үндэсний эрдэм шинжилгээний бүтээлийн нэгдсэн санг олон улсын жишигт нийцүүлэн хөгжүүлэх, мэдлэгийн дата төв байгуулж ил тод байлгахыг зорьсон бөгөөд үүнийг худалдан авах ажиллагааны ил тод байдлыг хангах 42-р зүйлийн хүрээнд хэрэгжүүлэхээр тусгажээ. Судалгааны ажлын мэдээллийг ШУТ сангийн цахим хуудас, MORI платформ, tendergov.mn, эсвэл www.sudalgaa.gov.mn зэрэг үндэсний судалгааны нэгдсэн платформд байршуулж олон нийтэд ил тод болгох заалт багтсан байна.

• Хуулийн 18-р зүйлийн 18.2.2 дахь хэсгийг “Дээд боловсролын тухай хуулийн 4.1.4-т заасан судалгааны их сургууль” гэж өөрчлөхөөр тусгажээ.

• Мөн хуулийн 32-р зүйлийн 32.2 дахь хэсэгт байсан “Үндэсний хорооны тогтоол, зөвлөмжийг үндэслэн” гэсэн агуулгыг хасах талаар заасан байна.

Энэхүү нэмэлт, өөрчлөлтийн төсөл батлагдсанаар шинжлэх ухааны салбарын байгууллагуудын үйл ажиллагааны уялдаа, ил тод байдал, инновацийг дэмжих шинэ боломж нээгдэхийг хууль санаачлагчид онцолж байна.

Эх сурвалж: Улсын Их Хурал