Сэлбэ хотын орон сууцжуулах төслийн гурав, дөрөвдүгээр багц тендерийг өмнөх долоо хоногт албаныхан таван багц болгон хуваан зарлахаа мэдэгдэж байсан бол долоодугаар сарын гуравны өдөр албан ёсоор зарлалаа.
Эдгээр таван багцад инженерийн шугам сүлжээ, орон сууцны барилга байгууламж, ногоон байгууламж зэрэг иж бүрэн бүтээн байгуулалтыг хамруулсан бөгөөд Сэлбэ хотын төв хэсгийг бүрдүүлэх үндсэн ажил хийгдэхээр төлөвлөгдсөн байна. Тендер зарлахаас өмнө талбайн хашаажуулалт бүрэн дуусч, цэвэрлэгээ, ариутгал болон инженерийн дэд бүтцийн ажлууд эцсийн шатандаа үргэлжилж байгаа аж.
Уг гурав, дөрөвдүгээр багцыг таван багц болгон өргөжүүлснээр дотоодын үйлдвэрлэгч, барилгын компаниудад боломж нээгдэхээс гадна төслийн зохион байгуулалтыг илүү оновчтой болгож, 2026 ондоо багтаан бүх ажлыг дуусгах зорилт хэвээр хадгалагдахыг “Сэлбэ хорин минутын хот корпорац” ХХК-ийн төслийн баг онцолжээ.
Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс