“Apple” компанийн “iPhone” ухаалаг гар утасны Хятад дахь борлуулалт энэ оны хоёрдугаар улиралд сүүлийн хоёр жилийн хугацаанд анх удаа өссөн талаар CNBC суваг “Counterpoint Research”-ийн судалгаанд үндэслэн мэдээллээ. Тодруулбал, өнгөрсөн оны мөн үеийнхтэй харьцуулахад найман хувийн өсөлттэй гарсан нь 2023 оны хоёрдугаар улирлаас хойш бүртгэгдсэн анхны өсөлт болж байна.

Энэхүү өсөлтөд тавдугаар сард зохион байгуулсан томоохон хямдралын аян чухал нөлөө үзүүлжээ. Ялангуяа Хятадын цахим худалдааны платформууд “iPhone 16” загваруудыг хямдруулсан бөгөөд хуучин загварын гар утсыг шинэ загвараар солих “trade-in” хөтөлбөрийн хүрээнд хуучин утасны худалдаж авах үнийг өсгөсөн нь хэрэглэгчдийг татсан гэж дүгнэж байна. “618” хэмээх жил бүр болдог цахим худалдааны их хямдралын өмнө ийнхүү үнийг бууруулсан нь маш оновчтой алхам болсон гэж “Counterpoint” компанийн орлогч захирал Итан Ци онцоллоо.

Гэсэн хэдий ч Хятадын ухаалаг гар утасны зах зээлд “Apple” компани байр сууриа “Huawei”-д алдаад байгаа юм. “Huawei”-гийн борлуулалт мөн улиралд өмнөх оны мөн үеэс 12 хувиар өсөж зах зээлд тэргүүлсэн бол хоёрдугаарт “Vivo”, гуравдугаарт “Apple” жагсжээ.

Энэхүү мэдээлэл гарсны дараа “Apple”-ийн хувьцаа 0.9 хувиар нэмэгдэж, 214.35 ам.долларт хүрсэн байна. Харин он гарсаар тус компанийн хувьцаа нийтдээ 15 орчим хувиар буурсан хэвээр байна.

Эх сурвалж: CNBC