Монгол Улсын Тэргүүн Шадар сайд бөгөөд Эдийн засаг, хөгжлийн сайд Н.Учрал өнөөдөр Монгол Улсын Их Хурлын дарга Д.Амарбаясгаланд Төсвийн тогтвортой байдлын тухай хуульд нэмэлт оруулах тухай хуулийн төслийг өргөн барилаа.

Хуулийн төсөл боловсруулахдаа 2026 оны төсвийн хүрээний мэдэгдэл, 2027-2028 оны төсвийн төсөөллийг нэг тонн нүүрсний үнийг 2025, 2026 онд 80 ам.доллар, 2027, 2028 онд 77 ам.доллар гэж тооцон, макро эдийн засгийн үзүүлэлтүүдэд суурилж тооцоолсон байна. Гэвч хуулийн төслийг анх өргөн мэдүүлснээс хойш гарсан статистик мэдээгээр 2025 оны эхний таван сарын байдлаар нүүрсний экспортын үнэ өнгөрсөн оны мөн үеэс 39 хувь, нийт экспорт 15 хувь, улсын төсвийн орлого 11 хувиар буурсан, эдийн засгийн өсөлт эхний улиралд 2.4 хувьд хүрч саарсан дүн гарчээ.

Эдгээр өөрчлөлт, эрсдэлтэй уялдуулан дунд хугацааны төсвийн хүрээний мэдэгдэлд нэгдсэн төсвийн тэнцвэржүүлсэн орлогын доод хэмжээ болон нийт зарлагын хэмжээг бууруулах шаардлага тулгарсан тул жилийн төсөв, төсвийн тодотголын төслийг өргөн мэдүүлж, батлах боломжийг бүрдүүлэх зорилгоор уг хуулийн нэмэлт төслийг боловсруулсан байна.

Эх сурвалж: Монгол Улсын Их Хурал.