Францын баруун өмнөд хэсэг болон Испанийн хэд хэдэн бүс нутагт ой хээрийн түймэр эрчимтэй тархаж, 250 мянга гаруй хүнийг орон гэрээ орхин аюулгүй бүс рүү нүүлгэн шилжүүлэхэд хүргээд байгаа юм. Түймэр Францын нэрт дарсны бүс болох Бордо хотын орчимд ойртсон тул онцгой байдлын алба өндөржүүлсэн бэлэн байдалд ажиллаж байна.

Францын Жиронд мужид гарсан түймэр 42 мянган га талбайг хамарч, Парис хотын нутаг дэвсгэрээс дөрөв дахин том газар нутгийг шатаажээ. Хэт халалт, хуурайшилт, салхины чиглэл тогтмол өөрчлөгдөж байгаа нь галыг унтраах ажиллагааг хүндрүүлж байгаа бөгөөд Бордо хотын ойролцоох таван суурингийн оршин суугчдыг шинээр нүүлгэн шилжүүлсэн байна. Харин Бордо хотод одоогоор албан ёсны нүүлгэн шилжүүлэх шийдвэр гараагүй байгаа аж.

Түймэртэй тэмцэх ажиллагаанд 2,500 гаруй гал сөнөөгч, 18 нисэх онгоц, цэргийн алба хаагчдыг дайчлаад байна. Галын улмаас олон зуун орон сууц шатаж, 75 гал сөнөөгч бэртжээ. Түүнчлэн зарим түймэр өөрийн үүсгэсэн хүчтэй агаарын урсгал, аянгатай үүлний нөлөөгөөр шинэ голомт бий болгож байгаа нь унтраах ажиллагааг улам хүндрүүлж байгааг албаныхан мэдээлжээ.

Испанид ч түймэр үргэлжилсээр байна. Мадрид, Валенсиа орчимд гарсан түймрийн улмаас 76 мянга гаруй хүнийг аюулгүй бүсэд нүүлгэн шилжүүлсэн бөгөөд нэг хүн амиа алдсан тухай эрх баригчид мэдээлжээ.

Мэргэжилтнүүдийн үзэж буйгаар Европ даяар үргэлжилж буй халуун агаарын давлагаа, хуурайшилт нь энэ жилийн ой хээрийн түймрийн эрсдэлийг эрс нэмэгдүүлж байна. Ирэх өдрүүдэд ч өндөр температур хадгалагдах төлөвтэй байгаа тул Франц, Испанийн эрх баригчид түймрийн аюул буурахгүйг анхааруулжээ.