Энэ оны долоодугаар сарын гуравны өдөр цахим орчинд “Үл таних этгээд дүүг минь зөрж өнгөрөхдөө хутгалсан байна” гэх мэдээлэл тарсан талаар олон нийтэд мэдээлэгдсэн. Үүнтэй холбогдуулан долоодугаар сарын гуравны шөнө 03 цаг 55 минутад Сонгинохайрхан дүүргийн хорин есдүгээр хорооны нутагт үйл ажиллагаа явуулдаг сүлжээ дэлгүүр дотор нэгэн эрэгтэй хүн нуруундаа хутгалуулсан байдалтай орж ирсэн тухай дуудлага мэдээлэл Цагдаагийн байгууллагад бүртгэгджээ.
Дуудлагын дагуу нутаг дэвсгэр хариуцсан цагдаагийн газрын жижүүрийн шуурхай бүрэлдэхүүний алба хаагчид хойшлуулшгүй ажиллагаа явуулж, хохирогч иргэн “Я”-гийн явсан маршрутыг тогтоон, мөн “Ногоон бүс” төслийн хүрээнд суурилуулсан гудамж талбайн хяналтын камерын тусламжтайгаар уг хэрэгт холбогдож болзошгүй Т, М гэх иргэдийг илрүүлэн, мөрдөн шалгах ажиллагааг үргэлжлүүлж байна.
Цагдаагийн байгууллагаас архи, согтууруулах ундаа хэтрүүлэн хэрэглэхгүй байх, олон нийтийн газар биеэ зөв авч явах, бие биедээ хүндэтгэлтэй хандахыг нийт иргэдэд анхааруулан зөвлөж байна.
Эх сурвалж: Цагдаагийн Ерөнхий Газрын Хэвлэл, Мэдээллийн Төв
