Үерийн нөхцөл байдал, ой хээрийн түймэр, газар хөдлөлт зэрэг цаг үеийн эрсдэлийн талаар Онцгой байдлын ерөнхий газрын холбогдох албаныхан мэдээлэл хийлээ. ОБЕГ-ын Эрсдэлийн удирдлагын газрын хэлтсийн дарга, хошууч Ш.Анхтуяа танилцуулахдаа, улсын хэмжээнд 21 аймгаас Орхон, Говьсүмбэр, Сүхбаатар аймаг их эрсдэлтэй буюу улбар шар түвшинд, 16 аймаг дунд эрсдэлтэй, 2 аймаг бага эрсдэлтэй үнэлэгдэж байгаа тухай дурдав. Мөн 330 сумын хэмжээнд маш их эрсдэлтэй 19 сум, их эрсдэлтэй 30 сум, дунд эрсдэлтэй 159 сум, бага эрсдэлтэй 94 сум, маш бага эрсдэлтэй 28 сум байгааг онцолж, нийт 137 мянга 740 өрх үерт өртөх өндөр эрсдэлтэйг тооцоолсон тул иргэдийг сонор сэрэмжтэй байхыг анхааруулсан юм.

ОБЕГ-ын Ажиллагааны удирдлагын газрын дарга, хурандаа А.Дашнямын мэдээлснээр, газар хөдлөлтийн идэвхжил энэ онд нэмэгдэж, он гарсаар 3.5-5.1 магнитудын хүчтэй чичирхийлэл 24 удаа бүртгэгдсэн нь өмнөх оныхоос 11 хувиар өссөн байна. Тухайлбал, Өвөрхангай аймгийн Богд суманд дөрвөн хагас магнитудын, Дундговь аймгийн Дэлгэрцогт суманд таван магнитудын хүчтэй газар хөдлөлт гарч, Улаанбаатар хотод ч мэдрэгдсэн боловч хохирол учраагүйг тодотгов.

Мөн Гал түймэртэй тэмцэх газрын хэлтсийн дарга, дэд хурандаа П.Соронзонболд улсын хэмжээнд өнөөдрийн байдлаар Сэлэнгэ аймгийн Баянгол, Ерөө суманд гарсан 3 ой, хээрийн түймрийг цурамд оруулж, Ерөө, Хүдэр, Мандал сумдад гарсан 4 түймрийг унтраахаар нийт 417 хүн, 38 автомашин, 1 нисдэг тэрэг оролцон ажиллаж байгааг мэдээллээ. Энэ он гарсаар 12 аймгийн 65 сум, нийслэлийн 3 дүүрэгт нийт 151 удаагийн ой хээрийн түймэр бүртгэгдсэн нь өмнөх оны мөн үеэс 50 гаруй хувиар нэмэгдсэн байна.

Иймд иргэдийг бүх төрлийн гамшгийн эрсдэлд бэлтгэлтэй, сонор сэрэмжтэй байхыг Онцгой байдлын байгууллагаас дахин сэрэмжлүүлж байна.

Эх сурвалж: Онцгой байдлын ерөнхий газар