Монгол Улсын Их Хурлын дарга Д.Амарбаясгаланд өчигдөр УИХ-ын гишүүн Д.Рэгдэл, Б.Уянга, Г.Хосбаяр нар Шинжлэх ухаан, технологийн тухай хуульд нэмэлт, өөрчлөлт оруулах тухай хуулийн төслийг өргөн барьсан байна. Тус хуулийн нэмэлт өөрчлөлтөөр төрийн өмчит эрдэм шинжилгээний байгууллагыг судалгааны чиглэлээр төр, орон нутгийн өмчийн хөрөнгөөр бараа, ажил, үйлчилгээ худалдан авахад зарлагдсан сонгон шалгаруулалтад оролцох үед тендерийн болон гүйцэтгэлийн баталгаанаас чөлөөлөх зохицуулалтыг тусгажээ.

Мөн үндэсний эрдэм шинжилгээний бүтээлийн нэгдсэн санг олон улсын жишигт нийцүүлэн хөгжүүлэх, мэдлэгийн дата төв байгуулж ил тод байдал хангах зорилгоор худалдан авах тухай хуулийн 42 дугаар зүйлийн 42.2-т захиалагчийн үүрэг болгон судалгааны ажлыг ил тод болгох тухай заалтыг нэмэхээр санал болгосон байна. Үүнийг ШУТ сангийн цахим хуудас, шинээр MORI платформ байгуулах, tendergov.mn эсвэл www.sudalgaa.gov.mn зэрэг үндэсний судалгааны нэгдсэн платформд байршуулах замаар хэрэгжүүлэх зохицуулалтыг тодорхойлжээ.

Түүнчлэн хуулийн 18 дугаар зүйлийн 18.2.2-т заасан “судалгааны их сургууль”-ийн тодорхойлолтыг Дээд боловсролын тухай хуулийн 4.1.4-т нийцүүлэн шинэчилж, 32 дугаар зүйлийн 32.2 дахь хэсгээс “Үндэсний хорооны тогтоол, зөвлөмжийг үндэслэн” гэсэн заалтыг хасахаар тусгасан байна.

Эх сурвалж: Монгол Улсын Их Хурал