АНУ-ын Ерөнхийлөгч Дональд Трамп болон ОХУ-ын Ерөнхийлөгч Владимир Путин нар пүрэв гарагт утсаар холбогдон, нэг цаг орчим ярилцсан талаар Кремль мэдээллээ. Тус ярианы үеэр Ерөнхийлөгч Трамп Украин дахь цэргийн ажиллагааг аль болох богино хугацаанд зогсоох асуудлыг дахин хөндсөн байна. Харин В.Путин хэлэлцээ хийхэд бэлэн гэдгээ илэрхийлсэн ч “цэргийн тусгай ажиллагааныхаа” зорилгоос ухрахгүй гэдгээ онцолжээ.
Д.Трамп сэтгүүлчдийн асуултад хариулахдаа уг яриа ямар нэгэн ахиц дэвшил авчраагүй бөгөөд Украины нөхцөл байдалд сэтгэл дундуур байгаагаа илэрхийлсэн байна. Түүнчлэн АНУ Украинд маш их хэмжээний зэвсэг нийлүүлж байгаа талаар дурдаад, Жо Байдены засаг захиргаа зэвсэг нийлүүлснээр улс орноо бараг хоосолчихсон гэж шүүмжилж, “өнөөдөр АНУ өөрөө хангалттай зэвсэгтэй байгаа эсэхдээ итгэлтэй байх шаардлагатай” хэмээн тодотгожээ.
Истанбулд гурав дахь шатны хэлэлцээ хэзээ болох болон Трамп, Путин нар ирээдүйд биечлэн уулзах талаар энэ удаагийн ярианд хэлэлцээгүй байна. Мөн тэд Иран, Сири, Ойрх Дорнодын бүс нутгийн нөхцөл байдлыг хамтатган ярилцсан тухай мэдээлэв. Энэ нь хоёр удирдагчийн зургаа дахь удаагийн утасны яриа бөгөөд өмнөх яриа нь зургаадугаар сарын 14-нд болж, мөн нэг цаг үргэлжилж байсан юм.
Эх сурвалж: Svoboda.org
