Улсын Их Хурлын гишүүн П.Батчимэг, Х.Болормаа, О.Батнайрамдал, Н.Батсүмбэрэл, С.Эрдэнэболд, Дав.Цогтбаатар, П.Сайнзориг, Г.Лувсанжамц, С.Цэнгүүн нар Замын хөдөлгөөний аюулгүй байдлын тухай хуульд нэмэлт, өөрчлөлт оруулах тухай хуулийн төслийг боловсруулж, Улсын Их Хурлын дарга Д.Амарбаясгаланд өргөн барилаа.

Сүүлийн жилүүдэд 18 нас хүрээгүй хүүхэд болон иргэд цахилгаан дугуй, скүүтерээр замын хөдөлгөөнд оролцох нь эрс нэмэгдэж, зам тээврийн осол, эрүүл мэнд, эд хөрөнгийн хохирол учруулах тохиолдол олширсон. 2025 оны эхний дөрвөн сарын байдлаар ийм төрлийн тээврийн хэрэгслээс шалтгаалсан 985 осол бүртгэгдсэн тухай онцолсон байна. Одоо мөрдөж буй хуульд эдгээр бичил цахилгаан тээврийн хэрэгслийн тодорхой ангилал, жолоочийн эрх, үүрэг, хариуцлагын зохицуулалт хангалтгүй байгаа тул энэхүү төслийг боловсруулжээ.

Хуулийн төсөлд цахилгаан скүүтер, дугуй зэрэг тээврийн хэрэгслийн ангиллыг шинээр тодорхойлохын зэрэгцээ жолоодох насны хязгаар, техникийн дээд хурд, зорчих боломжтой зам, замын хөдөлгөөнд оролцогчийн эрх, үүрэг, жолоочид хориглох зүйлсийг тусгажээ. Мөн тээврийн хэрэгслийн хүчин чадал, жин, тоноглолын шаардлага, нийтийн хэрэгцээний цахилгаан скүүтер, дугуйн үйлчилгээ эрхлэх эрх, зөвшөөрөл, үйлчилгээ үзүүлэгчийн хариуцлага зэргийг нарийвчлан зохицуулсан байна. Ингэснээр замын хөдөлгөөний аюулгүй байдлыг сайжруулахад чухал ач холбогдолтой гэж хууль санаачлагчид үзэж байна.