Нийслэлийн Засаг даргын дэргэдэх Нийгмийн хамгааллын тусгай төвийн дарга Ш.Мөнхцэцэг болон БНСУ-ын “Хан мөрнийг хамгаалах хөдөлгөөний төв” төрийн бус байгууллагын ерөнхийлөгч Нам Гүнг Ван нар хамтын ажиллагааны санамж бичигт гарын үсэг зурлаа. Уг арга хэмжээг нийслэлийн ЗДТГ-ын Нийгмийн бодлогын газрын мэргэжилтэн М.Намсрайхүү нээж, Улаанбаатар болон Намъянжү хотуудын олон жилийн найрамдал, хамтын ажиллагааны талаар онцлон ярив. 1998 оноос хойш хоёр хот боловсрол, соёл урлаг, хөдөө аж ахуй зэрэг салбарт хамтын ажиллагааг өргөжүүлсээр ирсэн бөгөөд энэ уламжлалын хүрээнд энэхүү шинэ санаачилга хэрэгжиж байгаа юм.

Намъянжү хотын захиргаанаас дэмжлэгтэйгээр “Хан мөрнийг хамгаалах хөдөлгөөний төв” төрийн бус байгууллага Улаанбаатар хотын эмзэг бүлгийн иргэдэд зориулсан Нийгмийн хамгааллын тусгай төвтэй хамтран ажиллах, дэмжлэг үзүүлэх тухай саналыг өмнө нь ирүүлж, үүний дагуу энэхүү санамж бичгийг байгуулжээ. Санамж бичгийн хүрээнд дараах гурван үндсэн чиглэлд хамтран ажиллахаар тохирсон байна. Үүнд:

• тус төвийн үйлчлүүлэгчдэд чиглэсэн боловсрол, хамгааллын үйлчилгээний дэмжлэг үзүүлэх

• хүрээлэн буй орчныг хамгаалах, цөлжилт бууруулах зорилгоор мод тарих, ойн нөхөн сэргээлт, зүлэгжүүлэлт, сайн дурын цэвэрлэгээ зохион байгуулах

• хоёр улсын харилцан соёл, туршлага солилцох хөтөлбөрүүдийг хэрэгжүүлэх

Мөн Солонгосын талаас 19 хүний бүрэлдэхүүнтэй төлөөлөгчдийн баг зургадугаар сарын 29-нөөс долоодугаар сарын 3-ны хооронд айлчилж, Нийгмийн хамгааллын тусгай төв болон тус төвийн өргөтгөл болох Сургалт хөгжлийн цогцолборын үйл ажиллагаатай газар дээр нь танилцсан байна. Айлчлалын үеэр “Хан мөрнийг хамгаалах хөдөлгөөний төв”-өөс тус төвөөр үйлчлүүлэгч иргэдэд зориулан өвлийн куртик 302 ширхэг, хүүхдийн таеквондогийн өмсгөл 65 ширхэг бүхий нийт 367 ширхэг хувцасыг 33 хайрцгаар хандивлажээ. Түүнчлэн цаашид хэрэгжүүлэх төсөл, санаачилгын талаар харилцан санал солилцсон тухай мэдээлэв.

Эх сурвалж: Нийслэлийн Засаг даргын Тамгын газар