Хятад улсын хүн амын тоо үргэлжлэн буурсаар байгаа бөгөөд өнгөрсөн онд 1.39 саяар буурч, 1.40828 тэрбум болсон тухай Хятадын Үндэсний статистикийн товчоо мэдээлэв.

"2024 оны эцэст БНХАУ-ын хүн амын тоо 1 тэрбум 408 сая 280 мянга болж, 2023 оны эцсийнхээс 1.39 саяар буурлаа" гэж баасан гарагт нийтэлсэн тус байгууллагын тайланд дурджээ.

Өнгөрсөн 12 сарын хугацаанд тус улсад 9.54 сая хүүхэд төрж, 10.93 сая хүн нас барсан байна. Өнгөрсөн оны эцсийн байдлаар хүйсийн харьцаа 104.49 коэффициенттэй гарчээ. Өөрөөр хэлбэл 100 эмэгтэй тутамд 105 орчим эрэгтэй ногдож байна гэж тайланд дурдсан байна. 

Тус улсын 16-59 насны буюу хөдөлмөрийн насны хүн амын тоо 857.98 сая болсон нь нийт хүн амын 60.9 хувийг эзэлж байна. Харин 60 ба түүнээс дээш настнуудын тоо 310.31 сая болж, нийт хүн амын 22 хувийг эзэлжээ. 

2024 оны эцсээр хотуудын хүн амын тоо 943.50 сая болсон нь 2023 оны эцсийнхээс 10.83 саяар нэмэгджээ. Хөдөөгийн хүн амын тоо 2023 оныхоос 12.22 саяар буурч, 464.78 сая болсон байна.