Балтийн тэнгис дэх харилцаа холбооны хоёр шилэн кабельд учирсан гэмтлийн шалтгааныг Балтийн тэнгисийн орнууд шалгаж эхэлжээ. Үүнийг хорлон сүйтгэх ажиллагаа байж болзошгүй гэж үзэж байгаа юм. 

Европын албан тушаалтнууд кабелийг гэмтээсэн гэж ОХУ-ыг шууд буруутгаагүй боловч Герман, Польш болон бусад улс хорлон сүйтгэх ажиллагаа байж болзошгүй гэж мэдэгдсэн бөгөөд Литва улсын Зэвсэгт хүчин уг хэрэг явдлын дараа тэнгис дэх эргүүлийнхээ тоо нэмэгдүүлжээ.

“НАТО болон ЕХ-ны орнуудын эсрэг чиглэсэн Оросын урьд хожид үзэгдээгүй өргөн цар хүрээтэй ажиллагаа эрчимжиж байгаа нь аюулгүй байдалд томоохон эрсдэл учруулж байна” гэж Франц, Герман, Итали, Польш, Их Британийн Гадаад хэргийн сайд нарын хамтарсан мэдэгдэлд дурдсан байна. 

Энэхүү эрс хатуу мэдэгдлийг бүрэн ажиллагаагүй болсон кабелиудтай холбоотой хэрэг явдлыг шалгах ажиллагаа эхэлж буй үед хийжээ. Кабелиудын нэг нь Финланд, Германыг, нөгөө нь Швед, Литва улсуудыг холбодог.

"Орос улс Европ дахь хорлон сүйтгэх ажиллагаагаа зогсоохгүй бол Польш дахь Оросын консулын газруудыг хаах болно" гэж Польшийн Гадаад хэргийн сайд Радослав Сикорский мягмар гарагт тус улсын нийслэлд Европын сайд нартай уулзсаныхаа дараа мэдэгджээ.

Германы Батлан хамгаалахын сайд Борис Писториус Брюссельд болсон өөр нэг уулзалтын үеэр ийм утгатай мэдэгдэл хийгээд "Эдгээр кабелийг санамсаргүй байдлаар гэмтсэн гэдэгт хэн ч итгэхгүй. Энэ бүхэн Оросоос гарч буй заналтай  уялдах ёстой" гэсэн байна. 

Харин Оросын эрх баригчид Европын дэд бүтцийг хорлон сүйтгэсэн гэж буруутгасныг няцааж, ийм мэдэгдлүүд нь Оросын эсрэг явуулж буй барууныхны мэдээллийн дайны нэг хэлбэр гэж мэдэгджээ.

Кабелиудын нэг нь ням гаригийн өглөө, нөгөө нь 24 цагийн дараа даваа гаригт бүрэн ажиллагаагүй болсон байна.