Ерөнхийлөгч асан Дональд Трамп энэ оны долоодугаар сард амь насанд нь халдах оролдлого гарсан Пенсильвани муж улсын Батлер хотод сонгуулийн кампанит ажлын цуглаанаа зохион байгуулжээ. Нэр дэвшигч халдлагын үеэр амь эрсэдсэн Кори Комператоред хүндэтгэл үзүүлж, ар гэрийнхэнд нь эмгэнэл илэрхийлсэн байна.

Ерөнхийлөгч асан мөн уг арга хэмжээний үеэр “Tesla” компанийн гүйцэтгэх захирал, технологийн салбарын тэрбумтан Илон Маскийг тайзан дээр үг хэлэхийг урьжээ. И.Маск энэ үеэр "Ийнхүү тайзан дээр зогсох нь нэр төрийн хэрэг. 2024 оны сонгууль бол бидний амьдралд тохиож буй хамгийн чухал сонгууль” хэмээн тодорхойлсон байна.

Долдугаар сард Ерөнхийлөгч асны амийг хөнөөх оролдлого гарсны дараачаас И.Маск Д.Трампыг дэмжих болсон байна. Мөн Д.Трамп сонгуульд ялсан тохиолдолд "И.Маскийг засгийн газрын үйл ажиллагааны үр дүнг хянах албаны тэргүүнээр томилно" гэдгээ мэдэгдсэн юм.

Харин Ардчилсан намаас нэр дэвшигч Камала Харрис бямба гаригт Хойд Каролина муж улсад очжээ. Дэд Ерөнхийлөгч тус муж улсад албаны хүмүүстэй уулзаж, “Хелен” хар салхины нөлөөгөөр учирсан хохиролтой биечлэн танилцсан байна. Уг шуурганы улмаас АНУ-д 220 гаруй хүн амиа алдсаны дийлэнх нь Хойд Каролинад бүртгэгджээ.

Эх сурвалж: CNN