Улаанбаатар, 2024 оны зургаадугаар сарын 18 /МОНЦАМЭ/.  Цаг уур, орчны шинжилгээний газрын мэдээлснээр, энэ сарын 18-ны өдрийн байдлаар Хэрлэн голын эх, Хангай нурууны Буянт, Заг, Цагаантуруут, Увс нуурын Баруунтуруун зэрэг голын усны түвшин өмнөх өдрийнхөөс 10-30 см нэмэгдсэн байна. 

Ховд гол Мянгад сум орчимд үерийн түвшинг 30 см орчим давсан байна.

Энэ сарын 18-нд нутгийн төв хэсгээр, 19-нд ихэнх нутгаар, 20-нд баруун, төв, зүүн аймгуудын нутгаар бороо, дуу цахилгаантай аадар бороо орох тул борооны өмнөх хүчтэй салхи, мөндөр, болзошгүй аянга цахилгаан, үерийн усны аюулаас сэрэмжтэй байхыг анхаарууллаа.

Мөн голын эрэг хөвөө дагуу бууж суурьшихгүй байх, бага насны хүүхдэд тавих анхаарал халамжаа сайжруулах, зориулалтын болон зориулалтын бус хөвөгч ашиглан гол руу орохгүй байх, хот суурин газрын үерийн далангийн ус зайлуулах хоолойгоор ус чөлөөтэй урсах нөхцлийг бүрдүүлэхийг орон нутгийн холбогдох байгууллага анхааралдаа авч урьдчилан арга хэмжээ авахыг зөвлөв.