Зам, тээврийн хөгжлийн яамны захиалгаар хийгдэж буй Туулын авто замыг Нисэхийн хурдны авто замтай холбох “Наадамчдын гүүр”-ийн зураг төслийн ажил дууссаныг Зам, тээврийн хөгжлийн яамнаас мэдээлжээ.

Наадамчдын авто зам дээгүүр барих энэхүү гүүр нь 800 метр урт, Монголын анхны дүүжин буюу татлагат гүүр болох юм.

Энэхүү гүүр нь 2 урсгал, 4-6 эгнээ, 2 талдаа явган хүний замтай байх бөгөөд тулгуурын өндөр нь 65 метр байхаар тооцоолж байна.

Гэрээнд заасны дагуу энэ сард зураг төслийн ажил бүрэн дуусаж, 2024-2026 онд барилгын ажил нь хийгдэж ашиглалтад орно.

Нийт 74 сая ам.долларын төсөвтэй уг гүүрийн нийт урт 846.5 у/м байх бол татлагат хэсгийн урт 270 у/м байна.

Энэхүү гүүр баригдсанаар Яармаг Нисэхийн чиглэлийн түгжрэл бүрэн арилж, хотын замын хөдөлгөөний эрчим сайжрах юм.