АН-ын даргад нэр дэвшигчдийг бүртгэх хугацаа өнөөдөр 20.00 цагт дуусч, нэр дэвшигчдэд батламж гардуулах бөгөөд маргааш болох сонгуулийн талаар Эв нэгдлийн ажлын хэсгээс албан ёсны мэдээлэл хийх юм байна.

Гэвч бүртгэл дуусах хугацаа ойртох тусам өмнө нь эчнээ яригдаж байсан нэр дэвшигчдийн нэрс бүдгэрч эхэллээ. Намын даргад нэр дэвших хүмүүсийн тоонд нэрлэгдэж байсан Ц.Баатархүү нэрээ татсан бол зайлшгүй нэр дэвших ёстой гэдэг хүлээлтийг үүсгээд байсан УИХ-ын гишүүн асан З.Нарантуяа мөн л өрсөлдөөнөөс гарч байгаа бололтой.

АН-ын ҮБХ-ны ээлжит бус хуралдаанаас баталсан журмын дагуу нэр дэвших хүсэлтээ гаргаж бүртгүүлсэн бүх нэр дэвшигчдийг санал хураалтанд оруулж, эхний шатанд 10 хувиас бага санал авсан нэр дэвшигчийг хасах, хоёр дахь шатнаас эхлэн хамгийн бага саналтай нэр дэвшигчид хасагдах журмаар санал хураалтыг явуулах ёстой.

Өчигдрийн байдлаар УИХ-ын гишүүн С.Одонтуяа, гишүүн асан З.Нарантуяа, Сангийн сайд асан С.Баярцогт, Боловсролын сайд асан Л.Гантөмөр, гишүүн асан Л.Гүндалай болон ҮБХ-ны гишүүн Ц.Баатархүү, М.Чимэддорж нар нэр дэвшихээр болсон тухай мэдээллүүд мэдээллийн сайтууд болон нийгмийн сүлжээгээр цацагдсан. Гэвч одоогийн байдлаар хамгийн түрүүнд нэр дэвшихээ илэрхийлсэн С.Баярцогт, Лу.Гантөмөр нараас өөр өрсөлдөгчид тодроогүй байна. Энэ нь магадгүй, нэг талаас намын эв нэгдлийг хангах үүднээс нэр дэвшигчдийн хооронд хийсэн тохиролцоо, олон нэр дэвшигчид саналаа хуваахаас болгоомжилсон хэрэг байх.

Нөгөө талаас, нэр дэвшихээр горилж байсан зарим нэг хүний тухайд нэрээ татахад хүрсэн өөр бодитой шалтгаанууд ч байгаа аж. Тухайлбал, намын залуучуудаас багагүй дэмжлэгтэй явсан ҮБХ-ны гишүүн М.Чимиддоржийн хувьд “ҮБХ-ны гишүүнээр таван жилийн турш сонгогдсон байх” гэдэг шаардлагыг хангаагүй тул маргаан үүсэхээс болгоомжилж нэрээ татсан байна.

М.Чимэддоржийн хувьд сая болсон Эв нэгдлийг хурлыг зохион байгуулахад оройлон оролцсон, зохион байгуулах багт ажилласан залуучуудын нэг. Өнгөрсөн хугацаанд орон нутгийн намуудтай хамгийн их ажилласан нь ч байж магадгүй.