УИХ-ын гишүүн Д.Сарангэрэл хатагтайн тухай мэдэхгүй хүн Монголд байхгүй дээ. ТВ5 телевизийн захирал асан, сэтгүүлч гишүүн. 2012 оны сонгуулиас хойш завсаргүй гурван удаа УИХ-д сонгогдсон. МАН-ынхан гурваас илүү сонгогдсон гишүүдээ “дархан түшээ” энэ тэр гэж хөөргөдөг, зусарддаг билүү. Мөн 2017 оноос хойш “завсаргүйгээр” гурван удаа гурван яам дамжин ажиллаж байна.

Гэхдээ юу юунаас илүү “Монгол төрийн хатан эрдэнэ” цолыг авсан анхны (бас эцсийнх нь байгаасай гэж залбирдаг даа) эмэгтэй гэдгээр нь андахаа больсон байх. 2020 оны УИХ-ын сонгуулийн өмнө УИХ-ын дарга Г.Занданшатар УИХ-ын гишүүн бөгөөд Эрүүл мэндийн сайдД.Сарангэрэлийг “Төрийн хатан эрдэнэ”-ээр тодруулсан нь явдал нь Богд хаант засгийн үеэс хойш 100 жилийн дараа болсон “түүхэн” үйл явдал байв шүү. Манай спикер бас л шогийн мэдрэмж гэж “агуу” хүн дээ. Эрүүл мэнд, Байгаль орчин, Хөдөлмөр, нийгэм хамгаалал гээд мэддэггүй, оролцохгүй салбар ч гэж энэ хүнд алга. Аргагүй л "төрийн хатан эрдэнэ" мөн санж.

Гэтэл “хатан эрдэнэ” маань сүүлийн үед буюу шинэ албан тушаал авснаасаа хойш байн байн будилах болов. Хамгийн түрүүнд “Албан өрөөндөө мөрийтэй тоглосон” асуудлаар албан тушаалаасаа чөлөөлөгдөх болзол хангасан Нийгмийн даатгалын ерөнхий газрын даргыг “Чөлөөлөх үндэслэлгүй” гэж Засгийн газрынхаа шийдвэрийг сөрөв. Түүнийхээр бол “авилга бол нийгмийн үзэгдэл” гэдэг шиг “төрийн албан тушаалтан мөрийтэй тоглох нь ажил хэргийн нэг хэсэг” юм шиг байна.

Тэр маргаан дуусаагүй байтал өчигдөр төрийн ордонд зохион байгуулсан “Халамжаас хөдөлмөрт” хэлэлцүүлгийн үеэр Нийгмийн хамгаалал, хөдөлмөрийн сайд Д.Сарангэрэл “Манай яамныхан ядуу өрхүүдээ “улны айл” гэж нэрлэдэг. Улны айлуудыг ядуурлаас гаргана” гэж амлав. Сайдын хэлснээр ядуурлын түвшингээс доогуур амьдралтай эдгээр өрхүүдэд оноосон “зорилтот бүлэг” гэдэг нэр ойлгомжгүй, тодорхойгүй байгаа учраас цаашдаа албан ёсоор “улны айлууд” гэж нэрлэхээр тогтож байгаа бололтой юм. "Улны айл" гэж байгаа болохоор тэдний доор “шалны айл” гэж бас байх хэрэгтэй болох биз. Үүний төлөө салбарын яам дахиад хичээл зүтгэл гаргах юм байна гэж ойлголоо.

Харамсалтай нь, сайдын хэлсэн энэ үг олон нийтийг бухимдуулаад зогссонгүй, салбарынхаа, яамныхаа ажилчдыг, тэдний өнгөрсөн жилүүдийн хүч хөдөлмөрийг (хөдөлмөрлөсөн нь үнэн бол шүү дээ) тэр чигээр нь татаж унагав. “Улны айл” гэдэг энэ доромж үгийг хэлэлцүүлгийн үеэр “албан ёсны нэршил” болтол нь хэрэглэсний төлөө сайдыг огцруулаад зогсохгүй салбарын ажиллагсадтай нийтээр нь ёс суртахуун ярих хэрэгтэй болж байх шиг байна. Төрийн албан хаагч гэдэг төрийн нэрийн өмнөөс иргэдэд үйлчилгээ үзүүлдэг үйлчилгээний ажилтан болохоос биш иргэдээ анги, давхарга болгож хуваагаад “улны”, “шалны” гээд доромжлоод, ялгаварлаж гадуурхаад суух ёс суртахууны эрх хэнд нь ч байхгүй.

Энэ үүднээсээ сайд Д.Сарангэрэлээс гадна энэ нэрийг хэлсэн, хэрэглэсэн бүх албан хаагч нартай ёс суртахууны хариуцлага ярих ёстой болж байх шиг. Тэгэхгүй бол "Би ингэж нэрлээгүй, тэд л ингэж хэл гэсэн" гэж мэтгэх л хүн дээ. Гуйж гуйж нэг яамны сайд болж аваад ганцхан үгээр бүхэл бүтэн салбараа татаж унагаадаг сайд гэж байх аа.

Б.ГАЛ