Өчигдөр буюу баасан гаригт Украины эзлэгдсэн бүс нутгийн иргэд ОХУ-д нэгдэх асуудлаар саналаа өгч эхэлжээ. Буутай орос цэргүүд айл бүрийн хаалгыг тогшиж, иргэдээс амаар саналыг нь аваад өөрсдөө хуудсан дээр тэмдэглэж байна. “Саналаа амаар хэлснийг цэргүүд хуудсан дээр тэмдэглээд авч явж байна” гэж Энергодар хотын оршин суугч эмэгтэй BBC сувагт мэдээлжээ.

Украины өмнөд бүсийн Херсон хотын төвд байрлуулсан саналын хайрцгийг буутай цэргүүд хамгаалж, хүмүүсийн саналыг цуглуулж байгаа тухай гэрчүүд мэдээлсэн байна. Айл бүрийн хаалгыг тогтших замаар санал хураах аргыг иргэдийн “аюулгүй байдал”-ыг хангах зорилготой гэж Оросын төв мэдээллийн агентлаг тайлбарлажээ.

“Биеэр очиж санал өгөх хэлбэрийг зөвхөн есдүгээр сарын 27-нд хэрэгжүүлнэ. Бусад өдрүүдэд санал хураалтыг олон нийтийн газар болон айл өрхүүдээр зохион байгуулах юм” гэж ТАСС агентлаг мэдээлсэн байна.

Буутай цэргүүд санал авахаар ирэхэд “үгүй” гэсэн сонголт хийсэн аавынхаа тухай Мелитополь хотын оршин суугч эмэгтэй мэдээлжээ. Ийм сонголт хийхэд “яах ч үгүй” гэж цэргүүд хэлсэн ч сүүлд ямар нэг байдлаар шийтгүүлэхээс айж байгаагаа тэр ярьсан байна. Мөн хүн бүр тусдаа биш, өрхийн гишүүдийн дунд ганц саналын хуудас хэрэглэж буйг тэр эмэгтэй гэрчилжээ. Дөрвөн өдөр үргэлжлэх санал хураалтын үр дүнд Украины эзлэгдсэн дөрвөн бүс нутгийн иргэд ОХУ-ын бүрэлдэхүүнд нэгдэх эсэхээ шийдэх юм.

Ингэж нэгтгэснийг олон улсын хэмжээнд хүлээн зөвшөөрөхгүй нь тодорхой. Гэвч Оросын эрх баригчид ийм аргаар эзлэгдсэн нутаг дэвсгэрийг өөрийн үндсэн газар нутагт тооцож, Өрнөдийн илгээсэн зэр зэвсгийн цохилтоос зайлсхийхээр оролдож байна. АНУ тэргүүтэй холбоотнууд Украинд орчин үеийн зэр зэвсэг нийлүүлэхдээ ОХУ-ын нутаг дэвсгэрт цохилт өгөхгүй гэсэн амлалтыг шаардаж байгаа. Хэрвээ ингэвэл Украины хямрал улам гүнзгийрэх аюултай юм.

Оросын эрх баригчид “хуурамч санал хураалтынхаа ирц, үр дүн зэргийг хэдийнээ бэлдчихсэн байгаа” тухай тагнуулын мэдээлэл авснаа Их Британийн гадаад хэргийн сайд Жэймс Кливерли өчигдөр мэдэгджээ. Энэ сардаа багтаан Донецк, Луганск, Херсон, Запорожье мужуудыг өөртөө албан ёсоор нэгтгэж дуусах зорилттой байгааг тэр мөн мэдээлсэн юм.

Харин Украины эрх баригчид санал хураалтын үр дүнгээс үл хамааран эзлэгдсэн газар нутгаа бүрэн чөлөөлөхөө мэдэгдэж байна.

Эх сурвалж: BBC