Дэлхийн Эрүүл Мэндийн Байгууллагаас олон улс оронд бүртгэгдээд байгаа сармагчны цэцэг өвчнийг дэлхий нийтийг хамарсан эрүүл мэндийн гамшигт тооцох шийдвэрийг өчигдөр гаргалаа.
Тус байгууллагын экспертүүд аливаа халдварт өвчнийг аюулын төвшнөөр нь үнэлж, ямар ангилалд оруулахаа шийдвэрлэдэг. Сармагчны цэцэг өвчин одоо Covid-19-тэй цуг хамгийн аюултай өвчний ангилалд багтаж байна. Энэ хоёроос гадна полиомиелит (халдварт саа) өвчин бас энэ ангилалд багтаж байгаа юм.
Сармагчны цэцэг өвчний халдварын тохиолдол дэлхийн 75 улсад 16,000 гаруй тохиолдол илрээд байна. Мөн уг дэгдэлтийн улмаас амиа алдсан хүний тоо тав болжээ.
Хэдийгээр халдварын тохиолдол, нас баралтын тоо харьцангуй цөөн, хүндрэх эрсдэл бага байгаа ч вирусийн тархалтын хурд өндөр байгаа нь хамгийн аюултай өвчний ангилалд оруулах үндэслэл болсныг ДЭМБ-ын ерөнхий нарийн бичгийн дарга Тедрос Адханом Гебрейесус хэлсэн байна.
Ийм шийдвэр гарснаар сармагчны цэцэг өвчний эсрэг вакцин бүтээх ажил эрчимжиж, халдвар тархалтыг зогсоох хариу арга хэмжээнд улс орнууд анхаарлаа илүү хандуулах ач холбогдолтойг тэр онцолжээ.
“Зөв бүлгийн хүмүүст хандсан зөв стратеги хэрэгжүүлж чадвал энэ удаагийн дэгдэлтийг зогсоох боломжтой” гэж доктор Гебрейесус өчигдөр болсон хэвлэлийн хурлын үеэр хэлсэн байна.
