Нийслэлийн прокуророос иргэн Д.Монголхүүд Эрүүгийн хуулийн тусгай ангийн 23.1 дүгээр зүйлийн 1 дэх хэсэгт зааснаар /хууль сахиулагчийг албан үүргээ биелүүлэхтэй нь холбогдуулан хүч хэрэглэсэн, хүч хэрэглэхээр заналхийлж эсэргүүцсэн/ яллах дүгнэлт үйлдэж, хэргийг тус шүүхэд ирүүлсэн.

Сүхбаатар дүүргийн Эрүүгийн хэргийн анхан шатны шүүх шүүгдэгч Д.Монголхүүд холбогдох хэргийг өнөөдөр буюу 2022 оны Тавдугаар сарын 25-ны өдөр хянан хэлэлцээд шүүгдэгчийг “2021 оны 09 дүгээр сарын 30-ны өдөр Сүхбаатар дүүргийн 6 дугаар хороо, “Жанжин Сүхбаатарын нэрэмжит” талбайд цуглаан зохион байгуулах үедээ Сүхбаатар дүүргийн Цагдаагийн газрын нэгдүгээр хэлтсийн албан хаагчдыг албан үүргээ биелүүлэхтэй нь холбогдуулан хүч хэрэглэн, хүч хэрэглэхээр заналхийлж эсэргүүцсэн буюу Эрүүгийн хуулийн тусгай ангийн 23.1 дүгээр зүйлийн 1 дэх хэсэгт заасан гэмт хэрэг үйлдсэн гэм буруутайд тооцон, 1 /нэг/ жилийн хугацаагаар зорчих эрхийг хязгаарлах ял оногдуулж, уг ялыг Улаанбаатар хот, Баянзүрх дүүргийн нутаг дэвсгэрээр тогтоон шийдвэрлэсэн байна.

Энэ талаар Иргэн Д.Монголхүү "Энэ хэргиин шүүх шийдвэрээ намайг гэм буруутайд тооцож, 1 жил БЗД-ийн нутаг дэвсгэрээс гарахыг хориглож шийдвэрлэлээ. Үндэслэл нь бүртгэлгүй жагсаал цуглаан зохион байгуулсан. Өөрөөр хэлбэл, цагдааг хууль ёсны шаардлага тавьсан болгож харагдуулахын тулд хүчиндчихлээ. Хэрэгт авагдсан нотлох баримт, бичлэгүүд бүгд цагдааг хууль бус шаардлага тавьсаныг нотлоод байхад шүү дээ! Цагдаа нэг ч удаа хууль тайлбарлах оролдлого хийгээгүйг бичлэг нотлоод байхад. Монгол улс гэмт хэрэгтэн үйлдвэрлэгч орон болсон байна. Голланд улс өнөөдөр шоронгүй улс болтлоо хөгжиж байхад манайх шорон нэмж барих тухай л ярьдаг төртэй болж" гэлээ.