Конрад Аденуар Сангаас санаачлан хэрэгжүүлдэг Улс төрийн залуу манлайлагчдын хөтөлбөр буюу KAS Political Empowerment College (KAS-PEC) хөтөлбөрийн тавдугаар сарын уулзалтад Монгол Улсын дөрөв дэх Ерөнхийлөгч Ц.Элбэгдорж урилгаар оролцжээ.

Тэрээр уулзалтаар Украин, Оросын хооронд үүссэн дайны нөхцөл байдал, үүнээс улбаалан Монгол Улсад үзүүлэх нөлөөлөл болон Ардчилсан намын будлиантай асуудлын талаар яриа өрнүүлжээ.

Энэ үеэр Ерөнхийлөгч асан Ц.Элбэгдорж "Украин НАТО-д элссэн ч ОХУ руу дайрна гэсэн ойлголт байхгүй. Харин жинхэнэ шалтгаан нь Украин ЕХ-той илүү гүнзгий харилцаатай болоод эдийн засаг нь өсөж, Украинчууд Европ руу визгүй зорчдог, ардчилсан хөгжингүй улс болбол ОХУ-аас илүү болно. Энэ нь өнөөгийн Оросын удирдагч нарт муу үлгэр жишээ болно. Эрх чөлөөгөө сонгосон улс орон амжилтад хүрчих бий гэдгээс л Путин айж байгаа" гэлээ. 

Мөн тэрээр "Ялалтын баярыг тохиолдуулан Улаанбаатарт зохион байгуулсан арга хэмжээнд төрийн албан хаагчид оролцсон нь байж боломгүй үйлдэл. Төр ийм алдаа гаргаж болохгүй. Хөршүүдийнхөө өмнө юун дээр хазаараа татах, юунд буулт хийх вэ гэдгээ сайтар бодох хэрэгтэй. ОХУ Украинд дайн зарласны дараа Монголоор дамжин өнгөрөх хийн хоолойн бичиг баримтад гарын үсэг зурсан. Үүнийг хойшлуулж болох байсан. Европт хийн хоолойг хаана гэж байхад өөр нэг газар нээх талаар ярилцаж байна гэсэн Оросын сурталчилгаанд ашиглууллаа. Монгол цэргүүд Улан-Үдэд Ялалтын баярт зориулсан цэргийн парадад оролцлоо. Энэ бол байж боломгүй асуудал" гэсэн юм. 

Мөн үргэлжлүүлэн Ардчилсан намын хагарлын асуудлаар "Ардчилсан нам нийлж нэгдэх хэрэгтэй. Ардчилсан намд үүссэн хагаралд санаа зовж, нийлэх ёстой гэж гишүүд, дэмжигчид ярьж буй нь манай нам давах ёстой даваа, орох ёстой шүүлтүүрээр орж байгаагийн нэг илрэл. Миний бодлоор Ардчилсан нам яван чангарна. Эрх баригч нам ялзрал руу явж байгаа бол Ардчилсан нам өсөлт үзүүлнэ" гэжээ.

Эх сурвалж: GOGO.MN