Засгийн газрын ээлжит хуралдаан өнөөдөр болж хуралдаанаас гарсан шийдвэрийг Эрүүл мэндийн сайд С.Энхболд танилцуулав. 

Энэ үеэр сайд С.Энхболд сэтгүүлчийн асуултад хариуллаа. 

Тэрээр "Эрүүл мэндийн салбарт хүний нөөц бэлдэх амаргүй. Зургаан жил сурч байж, хоёроос гурван жил нарийн мэргэжил эзэмшиж байж, их эмч болдог. Сувилагч дөрвөн жил сурдаг. Өнгөрсөн хугацаанд резидент эмч нарын төгсөлтийн шалгалтад хүртэл зохицуулалт хийж, хүний нөөцөө төлөвлөж ажилласан. Бид бүх боломжоороо л ажиллаж байгаа.

ХӨСҮТ-ийн хүмүүс өөрийн хүсэлтээр ажлаасаа чөлөөлөгдөх өргөдлөө өгсөн. Түүнээс бидний зүгээс ямар нэгэн дарамт шахалт үзүүлээгүй. Хэцүү цаг үед гол, үндэсний байгууллагаа хоосон байлгаж болохгүй. Тиймээс дараа дараагийн томилгоог хийж байгаа" гэлээ.

Халдварт өвчин судлалын үндэсний төвийн захирал Л.Баттөр ажлаас чөлөөлөгдөх хүсэлтээ гаргаж, түүний оронд Улсын хоёрдугаар төв эмнэлгийн дэд захирал Ц.Билэгтсайханыг томилохоор болсон байна. 

Мөн ХӨСҮТ-ийн дэд захирал Ж.Байгалмаа ажлаас чөлөөлөгдөх өргөдлөө өгсөн талаар мэдээлсэн билээ.