Э.Бат-Үүл: АН бол дуртай нь ирэнгүүтээ Ерөнхийлөгчид дэвшдэг чавесчуудын нам биш

МАН, МАХН-ын удирдлагууд өнөөдөр албан ёсоор нэгдэн, хамтын ажиллагааны гэрээнд гарын үсэг зурлаа. 

Харин энэхүү үйл явдлыг УИХ-ын гишүүн С.Ганбаатар эрс эсэргүүцэж байгаагаа мэдэгдэж МАХН-аас гарсан даруйдаа Ардчилсан намд элссэн билээ. 

Түүний энэхүү нүүдлийг зарим хүмүүс АН-аас 2021 оны Ерөнхийлөгчийн сонгуульд нэр дэвших гэж байна хэмээн дүгнэжээ.

Тэгвэл Нийслэлийн АН-ын дарга Э.Бат-Үүл "Намд маань фэнгшү Ганбаатар элсэж. Дөнгөж ирмэгцээ Ерөнхийлөгчид нэр дэвшинэ гэнэ. Үгүй байлгүй дээ! Нэгд, Ерөнхийлөгчид нэр дэвшигчид тавих  шаардлагыг хангахгүй. Хоёрт, АН бол дуртай нь ирээд нэр дэвшээд явдаг хямд Motel биш. Гуравт, АН нь чавесчуудын нам биш, өөр мундаг нэр дэвшигчтэй" гэжээ. 

Харин АН-ын дарга С.Эрдэнэ "Аливаа асуудлыг дүрмийн дагуу шийдвэрлэдэг байх ёстой! УИХ-ын гишүүн С.Ганбаатар МАХН-аас гарч АН-д элслээ гэжээ. АН-д хэн нэг УИХ-ын гишүүн С.Ганбаатар гэж хүнийг элсүүлээгүй гэдгээ албан ёсоор мэдэгдэж байна. Дүрмийн бус хэсэг бүлэг хүмүүс АН-ыг төлөөлөх эрхгүй" гэсэн юм.